დანიური ავეჯის საცალო ვაჭრობის კომპანია Jysk, რომელიც შვედური მწარმოებელი IKEA-სა და რუსული ქსელი Hoff-ის კონკურენტია, რუსეთში თავის პირველ მაღაზიებს 2020 წლის აპრილში გახსნის, იტყობინება „ვედომოსტი“ რუსეთში კომპანიის წარმომადგენელზე დაყრდნობით.
საცალო მაღაზიები გაიხსნება „ტროიკის“ სავაჭრო ცენტრში და ალტუფეევოს სამრეწველო და კომერციულ ზონაში მდებარე შენობაში. თავდაპირველად, ისინი ევროპელი მომხმარებლებისთვის ყველაზე პოპულარული პროდუქციის - ლეიბების, ბალიშების, თეთრეულის და სახლის აქსესუარების - გაყიდვას განახორციელებენ. თუ ამ პროდუქტებზე რუსეთში მოთხოვნა იქნება, Jysk-მა შესაძლოა გააფართოვოს თავისი ასორტიმენტი. დანიური ქსელის წარმომადგენლის თქმით, Jysk გეგმავს საშუალო ფასის პროდუქციის გაყიდვას, IKEA-სა და Hoff-ის მსგავსი.
ეს დანიური ქსელის მესამე მცდელობაა, დაიპყროს რუსული ბაზარი. Jysk-მა თავისი პირველი მაღაზია რუსეთში 1996 წელს გახსნა ფრენჩაიზის ქვეშ, მაგრამ ობიექტი ორი წლის შემდეგ დაიხურა. რუსეთის ბაზარზე შესვლის მეორე მცდელობა 2005 წელს განხორციელდა, თუმცა ქსელმა რუსეთიდან კვლავ 2007 წელს გავიდა.
Jysk დანიის უდიდესი ავეჯის საცალო ვაჭრობის კომპანიაა. IKEA-ს მსგავსად, ქსელი ხელმისაწვდომ ფასებში ავეჯსა და სახლის ნივთებს ყიდის. ამჟამად Jysk-ს 52 ქვეყანაში 2800 მაღაზია აქვს.
