გოგონას წინააღმდეგ უკვე შედგენილია ოქმი რუსეთის შეიარაღებული ძალების „დისკრედიტაციის“ ბრალდებით.
დაღესტნის რესპუბლიკის (რუსეთის ფედერაციის ნაწილი) ერთ-ერთ სკოლაში კურსდამთავრებულმა ბოლო ზარის დროს უკრაინისთვის თავისუფლება მოითხოვა და რუსეთის პრეზიდენტ ვლადიმერ პუტინს „ეშმაკი“ უწოდა. მალევე, ის და მისი დედა იძულებულნი გახდნენ, ბოდიში მოეხადათ ამ საქციელისთვის.
რეგიონალური Telegram არხების ცნობით, გოგონას უკვე წაუყენეს ბრალდება რუსეთის შეიარაღებული ძალების „დისკრედიტაციაში“.
ასევე შედგა ოქმი მისი მშობლების წინააღმდეგ არასრულწლოვნების აღზრდასთან დაკავშირებული ვალდებულებების შეუსრულებლობის გამო.
ვიდეოებში გოგონა ამბობს, რომ „უბრალოდ ყურადღების მიპყრობა სურდა“ და სინანულს გამოხატავს. ზუხრას დედა კამერის წინ აცხადებს, რომ ის მხარს უჭერს ხელისუფლებისა და ვლადიმერ პუტინის ქმედებებს, მხარს უჭერს უკრაინაში ჩატარებულ „სპეცოპერაციას“ და საკუთარ თავს პატრიოტს უწოდებს. ორივე შეშინებული ჩანს და გამეორებული ფრაზებით საუბრობს.
