2021 წლის 1 თებერვლიდან რუსეთში სოციალურ მედიაში გინება აიკრძალება. პლატფორმებს თავად მოეთხოვებათ უხამსი ენის ამოღება, წინააღმდეგ შემთხვევაში კი ჯარიმა დაწესდება.
ცვლილებების თანახმად, სოციალურ ქსელებს თავად უნდა ამოიცნონ და წაშალონ უკანონო კონტენტი. ეს განმარტება მოიცავს ნებისმიერ მასალას, რომელიც შეიცავს უხამს ენას.
უხამსი სიტყვების გარდა, სოციალურ ქსელებს ასევე მოეთხოვებათ წაშალონ არაკოორდინირებულ საპროტესტო აქციებში მონაწილეობისკენ მოწოდებები, სახელმწიფოსა და მისი სიმბოლოების შეურაცხყოფა და უხამსი შეტყობინებები, რომლებიც „შეურაცხყოფს ადამიანის ღირსებას და საზოგადოებრივ მორალს“. საკამათო სიტუაციებში სოციალურმა ქსელებმა განმარტება უნდა მოითხოვონ როსკომნადზორისგან; სხვა შემთხვევებში, კონტენტის დაბლოკვის შესახებ გადაწყვეტილება უნდა იქნას მიღებული მისი გამოქვეყნებიდან 24 საათის განმავლობაში.
ახალი წესების დარღვევისთვის, სოციალური ქსელის ადმინისტრაცია 800 000-დან 4 მილიონ რუბლამდე ჯარიმას გადაიხდის. განმეორებითი დარღვევის შემთხვევაში, ჯარიმა წლიური შემოსავლის ერთ მეათედამდე გაიზრდება. ამჟამად უხამსი ლექსიკის გამოყენებით პოსტების ავტორებისთვის ჯარიმები არ არის გათვალისწინებული.
