ყოფილ სირიელ მებრძოლებს 600-დან 3000 დოლარამდე შესთავაზეს
რუსეთმა გადაწყვიტა, აღმოსავლეთ უკრაინაში შეტევით 20 000-მდე მებრძოლი გაგზავნოს ლიბიიდან, სირიიდან და სხვა ქვეყნებიდან, იტყობინება The Guardian ევროპელ ოფიციალურ პირზე დაყრდნობით.
კერძოდ, ოფიციალურმა პირმა განმარტა, რომ აღმოსავლეთში დაქირავებულთა რაოდენობა 10 000-დან 20 000-მდე მერყეობს, თუმცა ამ მაჩვენებლის დიფერენცირება სირიელებს, ლიბიელებსა და „ვაგნერის PMC“-ის მიერ დაქირავებულ მებრძოლებს შორის რთულია.
„რაც შემიძლია გითხრათ არის ის, რომ ჩვენ მართლაც ვხედავთ გარკვეულ გადაადგილებას ამ ტერიტორიებიდან, სირიიდან და ლიბიიდან, აღმოსავლეთ დონბასის რეგიონში და ეს ბიჭები, ძირითადად, ქვემეხის ხორცად იყენებენ უკრაინული წინააღმდეგობის წინააღმდეგ. ისინი ქვეითი ჯარისკაცები არიან. მათ არ ჰყავთ მძიმე ტექნიკა ან მანქანები“, - თქვა ოფიციალურმა პირმა.
გამოცემის ცნობით, სირიელ დაქირავებულ მებრძოლებს უკრაინის წინააღმდეგ ომში მონაწილეობისთვის 600-დან 3000 დოლარამდე სთავაზობენ, წოდებისა და გამოცდილების მიხედვით. „ვაგნერის“ ჯგუფმა ასევე ლიბიიდან თავისი დაქირავებულების უმეტესობა გადაიყვანა.
რუსები ცდილობენ დააჩქარონ აღმოსავლეთ უკრაინის ოკუპაცია და ამ მიზნით მებრძოლები განალაგონ. დასავლელი ოფიციალური პირები მიიჩნევენ, რომ ეს აჩვენებს პუტინის სურვილს, უზრუნველყოს სულ მცირე რაიმე სახის გამარჯვება, რომლის გამოცხადებაც 9 მაისს მოსკოვში სამხედრო აღლუმზე იქნება შესაძლებელი.
