„არასამუშაო დღეების“ რეჟიმი გაუქმდა შემთხვევების დიდი რაოდენობის მიუხედავად.
რუსეთი კარანტინიდან გამოსვლას 12 მაისს დაიწყებს.
ამის შესახებ ორშაბათს რუსეთის პრეზიდენტმა ვლადიმერ პუტინმა განაცხადა.
„დღეს, 11 მაისს, არასამუშაო დღეების წინასწარ გამოცხადებული პერიოდი იწურება“, - ციტირებს პუტინის სიტყვებს საინფორმაციო სააგენტო „ტასი“.
კარანტინის მოხსნის გადაწყვეტილება მიღებულ იქნა იმის მიუხედავად, რომ რუსეთში ბოლო 24 საათის განმავლობაში კორონავირუსის ინფექციის თითქმის 11 700 ახალი შემთხვევა დაფიქსირდა, რაც შემთხვევების საერთო რაოდენობას მსოფლიოს ნებისმიერ სხვა ქვეყანაში აღემატება, გარდა შეერთებული შტატებისა და ესპანეთისა.
პუტინის თქმით, ეკონომიკური ძირითადი სექტორები, მათ შორის ენერგეტიკა, სოფლის მეურნეობა და მრეწველობა, შესაძლებლობის ფარგლებში 12 მაისიდან უნდა აღდგეს. რეგიონულ ხელისუფლებას უფლება აქვს, ადგილობრივი სიტუაციიდან გამომდინარე, გადაწყვიტოს, გააფართოვოს, შეამსუბუქოს თუ შეინარჩუნოს შეზღუდვები.
სამშაბათისთვის პუტინმა ბრძანა, მომზადდეს და რეგიონებისთვის ეცნობოს რეკომენდაციები კორონავირუსის პანდემიის გამო დაწესებული შეზღუდვების ეტაპობრივი მოხსნის შესახებ. ეს რეკომენდაციები მოიცავს შეზღუდვების მოხსნის ვადებს, კრიტერიუმებსა და პარამეტრებს, თითოეული რეგიონის კონკრეტული გარემოებების გათვალისწინებით.
რუსეთში მასობრივი ღონისძიებები კვლავ აკრძალული დარჩება.
პუტინი მიიჩნევს, რომ მიღებულმა ზომებმა ათასობით რუსის სიცოცხლე გადაარჩინა და ჯანდაცვის სისტემის გადატვირთვა თავიდან აიცილა. „წინასწარ მიღებული ზომების წყალობით, ათასობით სიცოცხლე უკვე გადარჩა და, რა თქმა უნდა, გადამწყვეტი როლი აქ ექიმებსა და ექთნებს ეკუთვნით“, - თქვა მან.
რუსეთის პრეზიდენტმა ასევე განაცხადა, რომ მაისის შუა რიცხვებისთვის რუსეთი გეგმავს კორონავირუსის ტესტების რაოდენობის გაორმაგებას დღეში 300 000-მდე.
ამავდროულად, პუტინმა ხანდაზმულ ადამიანებს მოუწოდა, „ცოტა ხანს მოთმინება გამოიჩინონ“ და კორონავირუსთან დაკავშირებული შეზღუდვები დაიცვან.
