რუსეთის ოლიმპიური კომიტეტი (ROC) იძულებული გახდა შეეჩერებინა სპორტული პროგრამების დაფინანსება, რომლის ჯამური ოდენობა 3.5 მილიარდ რუბლს აჭარბებს. ამის შესახებ სააგენტოს გენერალურმა დირექტორმა, ვლადიმერ სენგლეევმა პარასკევს, 20 ოქტომბერს განაცხადა.
ორგანიზაციის ტრადიციულმა სპონსორებმა ზარალი განიცადეს სხვადასხვა ქვეყნის მიერ რუსეთის წინააღმდეგ სანქციების დაწესების გამო.
„იმის გამო, რომ დაფინანსების წყაროების დადასტურება ვერ მოვახერხეთ, 3,514 მილიარდი რუბლის ღირებულების პროგრამების დაფინანსება შევაჩერეთ“, - ციტირებს TASS სენგლეევის სიტყვებს.
საერთაშორისო ოლიმპიური კომიტეტის კომუნიკაციების დირექტორმა, მარკ ადამსმა განაცხადა, რომ ორგანიზაციამ გადაწყვიტა რუსეთის ოლიმპიური კომიტეტის წევრობა შემდგომ შეტყობინებამდე შეაჩეროს.
გარდა ამისა, ორგანიზაციამ გადაწყვიტა, რომ რუს სპორტსმენებს არ მისცეს სამხრეთ კორეაში გასამართ 2024 წლის ახალგაზრდულ ოლიმპიურ თამაშებში მონაწილეობის უფლება. შეჯიბრი, რომელშიც 15-დან 18 წლამდე ასაკის სპორტსმენები მიიღებენ მონაწილეობას, 19 იანვრიდან 2 თებერვლამდე გაიმართება.
14 სექტემბერს რუსეთის ოლიმპიურმა კომიტეტმა გამოაცხადა, რომ აპირებს კომპენსაცია გადაუხადოს სპორტსმენებს საერთაშორისო შეჯიბრებებში გამოტოვებისთვის. კომიტეტმა განმარტა, რომ ფინანსური კომპენსაცია ასევე გადაეცემათ მათ, ვინც ხელს არ მოაწერს სპეციალური ოპერაციის დამგმობ დოკუმენტებს.
