რუმინეთის პრემიერ-მინისტრმა ნიკოლაე ჩიუკამ თანამდებობა კოალიციური მთავრობის მთავარ ლიდერებს შორის პრემიერ-მინისტრის თანამდებობის განაწილების შეთანხმების ფარგლებში დატოვა. გადადგომა საპროტესტო აქციების ფონზე მოხდა.
პრემიერ-მინისტრის თანამდებობა ახლა სოციალ-დემოკრატიული პარტიის ლიდერს, მარსელ ჩოლაკუს გადაეცემა. 2021 წელს ჩამოყალიბებულ კოალიციაში, ბატონი ჩიუკას ეროვნულ-ლიბერალური პარტიის გარდა, შედის რუმინეთში უნგრელების დემოკრატიული კავშირი.
რუმინეთის პრეზიდენტმა კლაუს იოჰანისმა მოაწერა ხელი ძალაუფლების გაყოფის შესახებ შეთანხმებას, რომლის მიხედვითაც პრემიერ-მინისტრის თანამდებობა კოალიციის მთავარ ლიდერებს შორის გადანაწილდებოდა. ნიკოლაე ჩიუკას მაისის ბოლომდე გადადგომა იგეგმებოდა, რათა ადგილი ბატონ ჩიოლაკუსთვის დაეტოვებინა, თუმცა ეს გეგმები მასწავლებლების გაფიცვების გამო გადაიდო. ქუჩებში ხელფასების გაზრდის მოთხოვნით ჯანდაცვის მუშაკები და პოლიციის თანამშრომლებიც გამოვიდნენ.
მასწავლებლებმა სამკვირიანი გაფიცვა მას შემდეგ შეაჩერეს, რაც მთავრობამ ხელფასების 25 პროცენტით გაზრდა და ყოველწლიური პრემიები 2027 წლამდე დაჰპირდა.
„მე ვფიქრობ, რომ ეს კონფლიქტი დასრულებულად ითვლება, ამიტომ დადგა დრო, რომ დავასრულო ჩემი, როგორც რუმინეთის პრემიერ-მინისტრის, უფლებამოსილების ვადა“, - განუცხადა ბატონმა ჩიუკამ ჟურნალისტებს და შეაქო თავისი კაბინეტი „სტაბილურობის უზრუნველყოფისთვის“ (ციტირებულია AFP-ის მიერ).
მომავალ წელს რუმინეთში საპრეზიდენტო და ადგილობრივი არჩევნები გაიმართება.
