1 ივლისს, უზბეკეთის ავტონომიურ რეგიონში, ყარაყალპაკსტანის რესპუბლიკაში, მასობრივი არეულობა დაიწყო მას შემდეგ, რაც ხელისუფლებამ გადაწყვიტა მისი განსაკუთრებული სტატუსის გაუქმება. „ამერიკის ხმის“ ცნობით, მომიტინგეები უზბეკეთის კონსტიტუციაში შეტანილ ორ ცვლილებას აპროტესტებდნენ: ერთი ყარაყალპაკსტანის სუვერენული სტატუსის გაუქმებას და მეორე უზბეკეთისგან გამოყოფის უფლების ჩამორთმევას.
არეულობა შაბათს გაგრძელდა, ქვეყნის მასშტაბით მომიტინგეებსა და უსაფრთხოების ძალებს შორის შეტაკებები მოხდა. მომიტინგეებმა სამთავრობო შენობების აღება სცადეს. სულ მცირე 18 ადამიანი დაიღუპა.
„სამწუხაროდ, არის მსხვერპლი მშვიდობიან მოსახლეობასა და სამართალდამცავ ორგანოებს შორის“, - განაცხადა უზბეკეთის პრეზიდენტმა შავკატ მირზიიოევმა, რომელიც არეულობის ადგილზე ჩავიდა.
უზბეკური საინფორმაციო ვებგვერდი Daryo.uz იუწყება, რომ ათასობით ადამიანი საავადმყოფოშია გადაყვანილი. ყარაყალპაკსტანში საგანგებო მდგომარეობაა გამოცხადებული.
შედეგად, უზბეკეთის პარლამენტმა გადაწყვიტა, შეენარჩუნებინა ყარაყალპაკსტანის სუვერენიტეტის სტატუსი კონსტიტუციის ახალ პროექტში და გაეუქმებინა შესაბამისი შესწორებები.
ყარაყალპაკსტანი ხორეზმის უძველესი სახელმწიფოს ნაწილია, რომელიც ძვ.წ. VII საუკუნიდან არის ცნობილი. 1873 წელს ხორეზმი რუსეთის იმპერიის კოლონიზაციას დაექვემდებარა. 1930 წლიდან 1936 წლამდე ყარაყალპაკსტანის ოლქი რსფსრ-ის შემადგენლობაში შედიოდა, ხოლო მოგვიანებით, ავტონომიური რეგიონის სახით, უზბეკეთის სსრ-ში შევიდა. 1990 წელს ყარაყალპაკსტანის პარლამენტმა სახელმწიფო სუვერენიტეტის დეკლარაცია მიიღო. 1993 წელს ხელი მოეწერა შეთანხმებას უზბეკეთთან 20 წლით შეერთების შესახებ, რეფერენდუმით გამოყოფის უფლებით.
