პოლონელი სამხედრო ანალიტიკოსის, კონრად მუზიკას თქმით, ბევრი ნიშანი არსებობს იმისა, რომ ბელორუსის არმია, სავარაუდოდ, რუსეთს შეუერთდება უკრაინაში შეჭრაში.
ეს მოსაზრება მუზიკამ, რომელიც ანალიტიკური ცენტრ „როჩან კონსალტინგის“ ხელმძღვანელია, ბრიტანულ მედიასაშუალება „სკაი ნიუსთან“ ინტერვიუში გამოთქვა.
ბელარუსის არმია გასული წლის აპრილიდან ფაქტობრივად უწყვეტ სამხედრო წვრთნებში მონაწილეობს. გასულ წელს არმიის აქტივობის დონე საბჭოთა კავშირის დაშლის შემდეგ ყველაზე მაღალი იყო.
ექსპერტი მიიჩნევს, რომ ამ წვრთნებში ბელარუსის არმიამ განავითარა ყველა ის სამხედრო შესაძლებლობა, რაც ომში მონაწილეობისთვის არის საჭირო.
მუზიკა ასევე ხაზს უსვამს, რომ ბელარუსმა ცოტა ხნის წინ განაახლა სამხედრო რეზერვისტების მონაცემები, რაც იმას ნიშნავს, რომ მისი სამხედრო რეზერვის სისტემა მობილიზაციისთვის მზადაა.
„ახლა მათ მხოლოდ პოლიტიკური გადაწყვეტილება სჭირდებათ მობილიზებისა და ომის დასაწყებად. ყველაფერი იმაზე მიუთითებს, რომ ბელარუსი გარკვეულ მომენტში ომში ჩაერთვება“, - მიაჩნია ექსპერტს.
24 თებერვალს, რუსეთის შეჭრის დაწყებიდან, ბელარუსმა რუსეთს თავის ტერიტორიაზე და საჰაერო სივრცეში წვდომა მისცა, რომელსაც ის უკრაინის წინააღმდეგ დარტყმების განსახორციელებლად იყენებს.
თუმცა, ბელორუსის არმია მაინც არ მონაწილეობდა ომში და მხოლოდ რუსული არმიის საჭიროებებისთვის სამხედრო ინფრასტრუქტურის გადაცემით შემოიფარგლა.
უკრაინის არმიის გენერალური შტაბი ბელორუსის უკრაინასთან ომში ჩართვას ნაკლებად სავარაუდოდ აფასებს.
