პოლონეთის მთავრობამ გერმანია უკრაინის არმიისთვის გადაცემული იარაღის შევსებასთან დაკავშირებული შეთანხმებების დარღვევაში დაადანაშაულა. კერძოდ, საქმე ეხება პოლონური ტანკების უკრაინის შეიარაღებული ძალებისთვის გადაცემას.
როგორც პოლონეთის საგარეო საქმეთა მინისტრის მოადგილემ, შიმონ შინკოვსკიმ აღნიშნა, ქვეყანა თავს ღალატად გრძნობს და ნატოს სხვა პარტნიორების დახმარებაზე დაყრდნობა სურს, იუწყება „შპიგელი“.
„გერმანიის დაპირებები ტანკების სანაცვლოდ მიწოდების შესახებ მატყუარა მანევრი აღმოჩნდა“, - განაცხადა პოლონელმა დიპლომატმა.
საუბარია ე.წ. წრიულ გაცვლაზე: რუსეთის მიერ უკრაინაში სრულმასშტაბიანი შეჭრის დასაწყისში, ბერლინმა, დასავლური აღჭურვილობის დიდი რაოდენობით მიწოდების ნაცვლად, შესთავაზა სქემა, რომლის მიხედვითაც სხვა ქვეყნები კიევს საბჭოთა აღჭურვილობის საკუთარ მარაგებს გადასცემდნენ უფრო თანამედროვე გერმანული აღჭურვილობის სანაცვლოდ.
ვარშავის კრიტიკის საპასუხოდ, გერმანიის თავდაცვის მინისტრმა კრისტინ ლამბრეხტმა გამოთქვა იმედი, რომ სიტუაცია დადებითად გადაწყდება. მინისტრმა აღნიშნა, რომ „ღრმა პატივისცემას“ გამოხატავს პოლონეთის მიერ უკრაინისთვის საბჭოთა T-72 ტანკების დროული მიწოდების მიმართ.
ლამბრეხტის თქმით, მწარმოებლებთან მოლაპარაკებები მიმდინარეობს.
„ზოგჯერ ყველაფერი ისე სწრაფად არ ხდება, როგორც ერთ ან მეორე მხარეს სურს. ჩვენ ამ საკითხს მწარმოებლებთან განვიხილავთ, რათა მათ შეძლონ წარმოების გაზრდა, სადაც ეს შესაძლებელია“, - აღნიშნა გერმანიის თავდაცვის მინისტრმა.
გამოცემის ცნობით, ბერლინს 212 ოპერატიულ Leopard 2 ტანკი ჰყავს, კიდევ 99 კი შეკეთების ან მოდერნიზაციის პროცესშია.
