საერთაშორისო მონაცემთა კორპორაციის (IDC) მიერ ჩატარებული კვლევის თანახმად, თანამედროვე ჭკვიანი სახლის მოწყობილობების ევროპულმა ბაზარმა მიმდინარე წლის პირველ კვარტალში, 2019 წლის ანალოგიურ პერიოდთან შედარებით, 3.8%-იანი ზრდა აჩვენა.
ინდუსტრიის მოცულობამ დაახლოებით 22.08 მილიონი ერთეული შეადგინა. ეს მაჩვენებელი მოიცავს ისეთი პროდუქტების გადაზიდვებს, როგორიცაა სეტ-ტოპ ბოქსები, მონიტორინგისა და დაცვის სისტემები, ჭკვიანი განათების მოწყობილობები, ჭკვიანი დინამიკები, თერმოსტატები და სხვა.
2020 წლის პირველ კვარტალში ევროპაში ჭკვიანი სახლის მოწყობილობების ბაზრის ლიდერი Google გახდა 16.8%-იანი წილით. მას მოჰყვა Amazon 15.8%-ით, ხოლო სამეულს Samsung 10.9%-ით ასრულებდა.
ანალიტიკოსები აღნიშნავენ, რომ კორონავირუსის გავრცელებამ შეანელა ევროპული ჭკვიანი სახლის მოწყობილობების ბაზრის ზრდა, რომელიც პანდემიამდე ორნიშნა ზრდას განიცდიდა.
თუმცა, მომავალში სიტუაციის გაუმჯობესებაა მოსალოდნელი. IDC 2020 წლიდან 2024 წლამდე CAGR-ის (რთული წლიური ზრდის ტემპი) 16.15%-ს ვარაუდობს. შედეგად, 2024 წელს ევროპაში 200 მილიონზე მეტი ჭკვიანი სახლის მოწყობილობა გაიყიდება, წელს პროგნოზირებული დაახლოებით 110 მილიონის წინააღმდეგ.
