რუსეთის მიერ უკრაინის წინააღმდეგ წარმოებული ომის მიუხედავად, ჩრდილოატლანტიკური ალიანსი დაჟინებით მოითხოვს უკრაინის სახელმწიფოს უფლებას, დამოუკიდებლად აირჩიოს უსაფრთხოების ალიანსები, რომლებშიც გაწევრიანება სურს.
ამის შესახებ ნათქვამია ნატოს წევრი ქვეყნების ლიდერების განცხადებაში, რომელიც პარასკევს ვირტუალურად გამართული საგანგებო სამიტის შემდეგ მიიღეს, იტყობინება „ევროპული პრავდა“.
„ნატო კვლავ ერთგული რჩება ევროპული უსაფრთხოების ყველა ფუნდამენტური პრინციპის, მათ შორის თითოეული ქვეყნის უფლების, აირჩიოს საკუთარი უსაფრთხოების მექანიზმები“, - ნათქვამია ალიანსის წევრ სახელმწიფოთა გადაწყვეტილებაში.
აღსანიშნავია, რომ 22 თებერვალს, შეჭრამდე, აგრესორი სახელმწიფოს მეთაურმა, ვლადიმერ პუტინმა, განაცხადა, რომ რუსეთის ფედერაციასთან ურთიერთობების ნორმალიზებისთვის, უკრაინამ უნდა აღიაროს რუსეთის სუვერენიტეტი ყირიმზე, უარი თქვას ნატოში წევრობაზე და ნაწილობრივ დემილიტარიზაცია მოახდინოს ქვეყნისთვის.
რუსეთმა არაერთხელ გამოთქვა ვარაუდი, რომ უკრაინის ნატოში გაწევრიანებას საკუთარი უსაფრთხოებისთვის საფრთხედ მიიჩნევს.
ნატომ ხაზგასმით აღნიშნა, რომ რუსეთის ომს უკრაინის წინააღმდეგ ბოლო ათწლეულების განმავლობაში ევროატლანტიკური უსაფრთხოებისთვის ყველაზე სერიოზულ საფრთხედ მიიჩნევს.
ნატოს წევრებმა მკაცრად დაგმეს რუსეთის მიერ უკრაინაში სრულმასშტაბიანი შეჭრა, რომელსაც მხარს უჭერდა ბელორუსი და მოუწოდეს სამხედრო მოქმედებების შეწყვეტისკენ.
