ნიდერლანდების პარლამენტმა დაამტკიცა კანონი, რომელიც მრავალი კომპანიის თანამშრომლებს სახლიდან მუშაობის უფლებას აძლევს.
BBC-ის ცნობით, მოსალოდნელია, რომ ეს პრეცედენტი მთელ ევროკავშირში შრომის კანონმდებლობაში ცვლილებებს გამოიწვევს.
კანონის საბოლოოდ მიღებამდე, ის ასევე უნდა დაამტკიცოს ქვეყნის სენატმა. თუ ეს მოხდება, ნიდერლანდები გახდება მსოფლიოში პირველი ქვეყანა, რომელიც დისტანციურ მუშაობას ლეგალიზებს. ექსპერტები ევროკავშირის ბევრ ქვეყანაში „შრომის რევოლუციას“ პროგნოზირებენ. გერმანიის ხელისუფლებამ უკვე გამოაცხადა მსგავსი ინიციატივის შემოღების შესახებ.
დისტანციური მუშაობის პროექტის ავტორები იყვნენ პროევროპული პარტიის, D-66-ის წარმომადგენელი სტივენ ვან ვინბერგი და სენა მაატუკი (მწვანეთა პარტია).
პარლამენტის მიერ დამტკიცებული კანონპროექტი ითვალისწინებს, რომ ნებისმიერ დასაქმებულს შეუძლია სთხოვოს დამსაქმებელს სახლიდან მუშაობა, თუ მისი ფიზიკური ყოფნა სამუშაო ადგილზე აუცილებელი არ არის. დამსაქმებლები ვალდებულნი არიან განიხილონ მოთხოვნა.
აღინიშნა, რომ ლოკდაუნის შემდეგ, ბევრმა გლობალურმა კომპანიამ დაიწყო თანამშრომლების ჰიბრიდულ სამუშაო გრაფიკზე გადაყვანა, რაც მათ საშუალებას აძლევს კვირის ნაწილის განმავლობაში სახლიდან იმუშაონ. ამ ინოვაციის პიონერებს შორის არიან შვეიცარიული ბანკი UBS და საფრანგეთის უდიდესი ბანკი BNP Paribas.
შეგახსენებთ, რომ ისლანდიამ და დიდმა ბრიტანეთმა ადრე გამოსცადეს ოთხდღიან სამუშაო კვირაზე გადასვლა, რამაც უნდა გააუმჯობესოს სამუშაოს ხარისხი და მოტივაცია.
