მოსკოვში უსაფრთხოების სამსახურის აგენტები კარდაკარ დადიან იმის გასარკვევად, ცხოვრობენ თუ არა ახლოს უკრაინელები ან აქირავებს თუ არა ვინმე საცხოვრებელს უკრაინელებზე.
მოსკოვმა ომის მოწინააღმდეგე რუსეთის მოქალაქეების აქტიური ძებნა დაიწყო. უპირატესობა ენიჭებათ უკრაინის ყოფილ მოქალაქეებს ან უკრაინული წარმოშობის პირებს.
ამის შესახებ უკრაინის მთავარი სადაზვერვო სამმართველო იტყობინება.
სამძებრო ოპერაციებში სამოქალაქო ფორმაში ჩაცმული პირები მონაწილეობენ. ისინი FSB-ის ოფიცრებს ასაღებენ და კარდაკარ დადიან, კითხულობენ, ცხოვრობენ თუ არა ახლოს უკრაინელები ან ვინმე აქირავებს თუ არა საცხოვრებელს უკრაინელებისთვის. ისინი ასევე ეკითხებიან მაცხოვრებლებს, თუ რა აზრის არიან მათ „სპეცოპერაციასთან“ დაკავშირებით.
დაზვერვის თანახმად, FSB ორ მიზანს მისდევს:
- ე.წ. „სვო“-ს („სპეციალური სამხედრო ოპერაცია“) მიმართ ნეგატიური დამოკიდებულების ჩამოყალიბებისა და გავრცელების თავიდან აცილება და იმ პირთა იდენტიფიცირება, რომლებსაც შეუძლიათ საზოგადოებაში დამოუკიდებელი აზრის ჩამოყალიბება და გავრცელება;
- საზოგადოებაში უკრაინელების ნეგატიური იმიჯის ჩამოყალიბება, მათი ტერორისტებად და რადიკალებად წარმოჩენა.
აღნიშნულია, რომ მომავალში რუსეთში შესაძლო „ტერორისტულ თავდასხმებში“ შესაძლოა უკრაინელებს დასდონ ბრალი.
როგორც ადრე იყო ცნობილი, რუსეთის სადაზვერვო სამსახურები საკუთარ ქვეყანაში ტერორისტული თავდასხმების სერიას გეგმავენ, რაც მშვიდობიან მოსახლეობაში მასობრივ მსხვერპლს გამოიწვევს. ეს ყველაფერი საზოგადოებრივი მობილიზაციის გასამართლებლად და ანტიუკრაინული ისტერიის გასაღვივებლად კეთდება.
