რუსეთი დაემატა იმ ქვეყნების სიას, რომელთა მოქალაქეებსაც შეეძლებათ მონტენეგროში შესვლა COVID-19 პანდემიასთან დაკავშირებული დამატებითი პირობების გარეშე, იტყობინება სამშაბათს მონტენეგროს მაუწყებელი RTCG.
RTCG-ის ცნობით, მონტენეგროს ტურიზმის ინდუსტრიის ოპერატიულმა შტაბმა ეს წინადადება ინფექციური დაავადებების ეროვნული საკოორდინაციო ოფისის სხდომაზე წამოაყენა.
რუსეთთან ერთად, გადამუშავებულ „მწვანე სიაში“ აზერბაიჯანიც შევიდა.
ამჟამად მონტენეგროში COVID-19 პანდემიის გამო უცხოელებისთვის ორი „მწვანე“ და „ყვითელი“ სიაა. პირველ სიაში შედის ევროკავშირის 11 ქვეყანა, ნორვეგია და შვეიცარია; ამ ქვეყნებიდან ტურისტებს მონტენეგროში შესვლა შეზღუდვების გარეშე შეუძლიათ. მეორე სიაში შედის მონტენეგროს ბალკანეთის მეზობლები: ბოსნია და ჰერცეგოვინა, ალბანეთი, კოსოვოსა და მეტოხიის ავტონომიური პროვინცია, ასევე ისრაელი, კანადა და სინგაპური. ამ ქვეყნებიდან ტურისტებმა უნდა წარმოადგინონ COVID-19-ზე უარყოფითი ტესტი, რომელიც საზღვარზე ჩასვლამდე არაუგვიანეს 48 საათისა უნდა ჩატარდეს.
ადრე გავრცელდა ინფორმაცია, რომ კორონავირუსი მონტენეგროში კატასტროფულ ტურისტულ სიტუაციას ქმნის. მონტენეგროს საზღვრები ქვეყნების უმეტესობასთან დაკეტილია და ტურისტების ნაკლებობის გამო, სასტუმროების ნახევარი კვლავ დაკეტილია, პლაჟებზე კი მხოლოდ ადგილობრივი დამსვენებლები იმყოფებიან.
ამ სეზონზე მონტენეგროში 90%-ით ნაკლები ტურისტია, ვიდრე ადრე, მიუხედავად იმისა, რომ ქვეყანაში ბევრი ადამიანი მთლიანად ტურიზმის ინდუსტრიაზეა დამოკიდებული.
