მოლდოვას ანტიკორუფციული პროკურატურა, ინფორმაციისა და უსაფრთხოების სამსახურთან ერთად, ყოფილი პრეზიდენტის, იგორ დოდონის სახლში ჩხრეკას ატარებს. ყოფილი ლიდერი ღალატში, პასიურ კორუფციასა და უკანონო გამდიდრებაშია ეჭვმიტანილი.
დოდონი ასევე ეჭვმიტანილია მოლდოველი ბიზნესმენისგან ვლადიმერ პლაჰოტნიუკისგან ქრთამის აღებაში, რომლის წინააღმდეგაც სამშობლოში სისხლის სამართლის საქმეა აღძრული. ამის შესახებ გენერალური პროკურატურის პრესსამსახურის ხელმძღვანელმა, მარიანა კერპიკმა განაცხადა.
„ჩხრეკა ტარდება მოლდოვას სისხლის სამართლის კოდექსის 324-ე მუხლის (პასიური კორუფცია), 181-ე მუხლის მე-2 პუნქტის (კრიმინალური ორგანიზაციის მიერ პოლიტიკური პარტიის დაფინანსება), 337-ე მუხლის (ღალატი) და 330-ე მუხლის მე-2 პუნქტის (უკანონო გამდიდრება) ქვეპუნქტებით გათვალისწინებული დანაშაულის ჩადენის საფუძვლიანი ეჭვის საფუძველზე აღძრული საქმის ფარგლებში“, - განაცხადა კერპეკმა.
18 მაისს მოლდოვას გენერალურმა პროკურატურამ სისხლის სამართლის საქმე აღძრა სოციალისტური პარტიის საპატიო თავმჯდომარის, ყოფილი პრეზიდენტის, იგორ დოდონის წინააღმდეგ, 2020 წლის ზაფხულში პარლამენტის წევრის, იური რენიტას მიერ გამოქვეყნებული ვიდეოჩანაწერების გამო. კადრებში ასახულია ყოფილი ლიდერისა და დემოკრატიული პარტიის ყოფილი ლიდერის, ვლადიმერ პლაჰოტნიუკის შეხვედრა 2019 წლის ივნისში, სადაც პლაჰოტნიუკმა დოდონს გადასცა ამანათი, რომელშიც, საუბრის მიხედვით თუ ვიმსჯელებთ, დიდი თანხა იყო — სოციალისტური პარტიის დასაფინანსებლად.
ადრე გავრცელდა ინფორმაცია, რომ მოლდოვას ყოფილმა პრეზიდენტმა დოდონმა წმინდა გიორგის ლენტი გამოაჩინა და დააჯარიმეს. თავად დოდონმა 9 მაისს, თავის Facebook გვერდზე რუსული აგრესიის ერთ-ერთი სიმბოლოს საჯაროდ გამოყენების შედეგებზე ისაუბრა.
