მოლდოვამ დნესტრისპირეთში განლაგებული ე.წ. ოპერატიული ჯგუფის რუს ჯარებს ქვეყანაში შესვლაზე უარი უთხრა. რუს ჯარებს „ნეიტრალიტეტის სტატუსის დამრღვევი უკანონო ფორმირება“ უწოდეს.
ამის შესახებ მოლდოვას საგარეო საქმეთა სამინისტროს განცხადებაშია ნათქვამი. სამინისტრომ კიდევ ერთხელ დაადასტურა ქვეყნის ხელისუფლების პოზიცია რუსული ჯარებისა და საბრძოლო მასალის საწყობების ქვეყნიდან უპირობოდ გაყვანის აუცილებლობის შესახებ.
„რუსეთის ჯარების ე.წ. ოპერატიული ჯგუფის ოფიცრები - უკანონო ფორმირება, რომელიც მოქმედებს ჩვენი ქვეყნის ტერიტორიაზე და არღვევს მის ნეიტრალიტეტს - არ შეუშვეს მოლდოვას ტერიტორიაზე“, - ნათქვამია განცხადებაში.
თავის მხრივ, მოსკოვმა კიშინიოვი რუსი „სამშვიდობოების“ რეგიონში შესვლის ხელის შეშლაში დაადანაშაულა და „შეშფოთება გამოთქვა მოლდოვას ნატოსთან დაახლოების ტენდენციის გამო“.
„ჩვენი ქვეყანა უარყოფს მის წინააღმდეგ წაყენებულ ბრალდებებს და ცალსახად აღნიშნავს, რომ რუსი სამხედრო მოსამსახურეების არასანქცირებული შესვლის შემთხვევებში, ისინი დაკავშირებული იყო მექანიზმით დადგენილი კრიტერიუმების შეუსრულებლობასთან“, - ნათქვამია მოლდოვას საგარეო საქმეთა სამინისტროს განცხადებაში.
როგორც ცნობილია, დნესტრისპირეთში დისლოცირებულ რუსეთის სამხედრო კონტინგენტს ოფიციალურად რუსეთის ძალების ოპერატიული ჯგუფი (OGRF) ეწოდება. OGRF შეიქმნა ყოფილი მე-14 რუსული არმიის ნარჩენებისგან, რომელიც აქ 1990-იანი წლების დასაწყისში იყო განლაგებული და აქტიურად მონაწილეობდა დნესტრისპირეთის კონფლიქტში.
დნესტრისპირეთში მოქმედი რუსეთის სპეციალური დანიშნულების რაზმი შედგება ორი ცალკეული მექანიზებული ბატალიონისგან (82-ე და 113-ე), რომლებიც როტაციის პრინციპით მოძრაობენ, ასევე უსაფრთხოების ბატალიონისგან და სამსახურებრივი ბატალიონისგან. ოკუპირებული ძალების რაზმის მუდმივი შემადგენლობა დაახლოებით 410-420 სამხედრო მოსამსახურეს შეადგენს. თუმცა, რუსეთმა შესაძლოა ეს რიცხვი 1700 სამხედრო მოსამსახურემდე გაზარდოს — იგივე რაოდენობა, რაც მან 1992 წელს გამოაცხადა, როდესაც თავისი ჯარები „სამშვიდობოებად“ გამოაცხადა.
2000 წელს სტამბოლში გამართულ საერთაშორისო სამიტზე რუსეთმა აიღო ვალდებულება, რომ 2004 წლის ბოლომდე გაიყვანდა ამ ჯგუფს, თუმცა ჯერ კიდევ არ შეუსრულებია ნაკისრი ვალდებულება. მოლდოვა დნესტრისპირეთში „ოგრეს“ ყოფნას უკანონოდ მიიჩნევს და მის გაყვანას მოითხოვს.
