ამ ნამუშევრის დამზადებისას არცერთი მამონტი არ დაშავებულა
ხელოვნური ხორცის წარმოებაში სპეციალიზირებულმა ავსტრალიურმა კომპანია Vow-მ მომხმარებლებს უჩვეულო კერძი შესთავაზა, რომელიც მათ პრეისტორიული ცხოვრების ატმოსფეროში ჩაძირვის საშუალებას აძლევს.
„გარდიანის“ ცნობით, ხორცის ბურთულებს მამონტის არომატი აქვს. რა თქმა უნდა, მათი წარმოებისას არცერთი მამონტი არ დაშავებულა და ამის ნაცვლად, კომპანიამ დახმარებისთვის კუინზლენდის უნივერსიტეტის ბიოინჟინრებს მიმართა.
აღნიშნულია, რომ მათ მატყლიანი მამონტის გენომიდან აიღეს დნმ-ის ის ნაწილი, რომელიც პასუხისმგებელია მიოგლობინის ცილის წარმოქმნაზე, რომელიც ხორცს დამახასიათებელ გემოს აძლევს და დაკარგული ელემენტები თანამედროვე სპილოების გენომის ფრაგმენტებით შეავსეს.
შემდეგ ის ცხვრის კუნთის დნმ-ში შეიყვანეს და ბიორეაქტორში გაგზავნეს, სადაც შესაძლებელი გახდა 20 მილიარდი უჯრედის წარმოება, რაც საკმარისი იყო ერთი ხორცის ბურთულისთვის.
მამონტის გემოს შესახებ ჯერ არაფერია ცნობილი, რადგან მიღებული პროდუქტი ჯერ არავის გაუსინჯავს — მკვლევარებმა არ იციან, როგორ რეაგირებს ადამიანის სხეული იმ ცხოველის ცილაზე, რომელსაც ათასობით წლის განმავლობაში არ შეხვედრია.
Vow-ს მიზანია ლაბორატორიაში მოყვანილი ხორცის შესახებ ცნობიერების ამაღლება, რადგან ტექნოლოგია შეამცირებს მეცხოველეობის მოშენების გარემოზე ზემოქმედებას და შეამცირებს სასაკლაოსთვის გაზრდილი ცხოველების ტანჯვას.
მამონტის ხორცის შერჩევა გარკვეული მიზეზის გამო მოხდა, რადგან ეს ცხოველი კლიმატის ცვლილებისა და ადამიანის მიერ განადგურების გამო გადაშენდა.
