საფრანგეთის პრეზიდენტი ემანუელ მაკრონი ბელორუსის პრეზიდენტობის ყოფილ კანდიდატ სვეტლანა ტიხანოვსკაიას შეხვდება, იუწყება France 24.
შეხვედრა ლიეტუვაში 29 სექტემბრის დილით არის დაგეგმილი. ეს მას შემდეგ მოხდა, რაც ტიხანოვსკაიამ მაკრონს ბელარუსში პოლიტიკური კრიზისის მოგვარებაში შუამავლობა და პროცესში რუსეთის პრეზიდენტი ვლადიმერ პუტინის ჩართვა სთხოვა. ბელარუსის ოპოზიციის ლიდერმა მაკრონს ასევე „ევროპასა და მსოფლიოში ერთ-ერთი ყველაზე ძლიერი ლიდერი“ უწოდა.
მანამდე მაკრონმა აღფრთოვანება გამოხატა ბელარუსში მომიტინგეების მიმართ და პრეზიდენტ ალექსანდრე ლუკაშენკოს ნებაყოფლობით გადადგომისკენ მოუწოდა. საპასუხოდ, ლუკაშენკომ საფრანგეთის ლიდერს ურჩია, „გამოცდილი პოლიტიკოსის მსგავსად“ ყურადღება ქვეყნის შიდა საქმეებზე გაემახვილებინა.
ბელარუსში საპრეზიდენტო არჩევნები 9 აგვისტოს გაიმართა. ცენტრალურმა საარჩევნო კომისიამ გამოაცხადა, რომ ლუკაშენკომ ხმების 80 პროცენტი მიიღო, ხოლო ტიხანოვსკაიამ - 10 პროცენტი. ამან მთელი ქვეყნის მასშტაბით მასობრივი საპროტესტო აქციები გამოიწვია, რომლებიც უკვე 50 დღეა გრძელდება.
წაიკითხეთ წყარო
