არქეოლოგებმა კრეტას კუნძულზე აღმოაჩინეს უძველესი ნაგებობა, რომელიც 1800 კვადრატულ მეტრს მოიცავს და მინოტავრის ლაბირინთს მოგვაგონებს. მისი ასაკი დაახლოებით 4000 წელია შეფასებული.
„რვა ერთმანეთზე განლაგებული ქვის რგოლისგან შემდგარი, რომელთა პატარა კედლები ოთახებს ქმნის, შენობა თითქმის ლაბირინთს წარმოადგენს“, - აღნიშნა სამინისტრომ.
ის, სავარაუდოდ, მინოსური ცივილიზაციის წარმომადგენლებმა ააშენეს, რომელიც თავისი დახვეწილი სასახლეებითა და ფრესკებით იყო ცნობილი. შესაძლოა, ნაგებობა სხვადასხვა რიტუალებისთვის გამოიყენებოდა, რადგან შიგნით ცხოველის ძვლები იპოვეს.
ლაბირინთს რთული შიდა სტრუქტურა ჰქონდა, რომელიც დაყოფილი იყო ერთმანეთთან დაკავშირებული პატარა კამერებად. იგი გარშემორტყმული იყო რვა საფეხურიანი კედლით, რომელთა სიმაღლე 1,7 მეტრამდე იყო.
მეცნიერებმა აღნიშნეს ნაგებობის მსგავსება კრეტელი მეფე მინოსის ლაბირინთთან, რომელიც აღწერილია ძველ ბერძნულ მითოლოგიაში. ლეგენდის თანახმად, აქ ცხოვრობდა მინოტავრი — ურჩხული ადამიანის სხეულითა და ხარის თავით.
