კიევის ოლქის დეოკუპაციიდან ერთი თვის შემდეგ, რუსი დამპყრობლების მიერ ჩადენილი სისასტიკის კვალი კვლავაც იკვეთება. მაკაროვკას ტერიტორიული თემის სოფელ კალინოვკაში ნაწამები მშვიდობიანი მოსახლეობის საფლავები აღმოაჩინეს.
უკრაინის გენერალური პროკურატურის ცნობით, სოფელში რუსების მიერ მოკლული ორი მამაკაცის ცხედარი იპოვეს.
მათ სხეულებზე წამების კვალი აღმოაჩინეს.
წინასწარი გამოძიებით დადგინდა, რომ სოფლის ოკუპაციის დროს რუსმა ჯარისკაცებმა მამაკაცები დაატყვევეს და შეურაცხყოფა მიაყენეს. უკრაინელების მოკვლამდე ოკუპანტებმა მათ ფრჩხილები მოაგლიჯეს. შემდეგ რუსებმა მსხვერპლებს ხელები ზურგს უკან შეუკრეს და დახვრიტეს.
მამაკაცების ცხედრებს ცეცხლსასროლი იარაღიდან მიყენებული მრავლობითი ჭრილობა აღენიშნებოდა.
რუსი ოკუპანტების მიერ ომის კანონებისა და წეს-ჩვეულებების დარღვევის გამო, ამ ინციდენტთან დაკავშირებით სისხლის სამართლის გამოძიება დაიწყო. ამჟამად წინასასამართლო გამოძიება მიმდინარეობს.
„კიევის ოლქის პროკურორები აგრძელებენ რუსი სამხედრო მოსამსახურეების მიერ ჩადენილი დანაშაულების დოკუმენტირებას მათი პასუხისგებაში მიცემის მიზნით“, - ნათქვამია განცხადებაში.
სამართალდამცავმა ორგანოებმა აგრესორი ქვეყნის არმიის 10 სამხედრო მოსამსახურეს ეჭვის შესახებ შეტყობინება გაუგზავნეს. ისინი შესაძლოა კიევის ოლქის ქალაქ ბუჩაში მშვიდობიანი მოსახლეობის წამებაში იყვნენ ჩართულნი.
