ესპანეთის მთავრობა მზადაა უკრაინას მიაწოდოს მწყობრიდან გამოსული Leopard 2A4 საბრძოლო ტანკები, ჩაატაროს ტანკების ეკიპაჟის წვრთნები და გადასცეს საზენიტო-სარაკეტო სისტემები, იუწყება El Pais სამთავრობო წყაროებზე დაყრდნობით.
წყარო უკრაინის შეიარაღებული ძალებისთვის დაახლოებით 40 ტანკს ახსენებს, რომლებიც შეკეთებასა და განახლებას საჭიროებს. სადავო ტანკები 108 მეორადი საბრძოლო მანქანის პარტიის ნაწილია, რომელიც გერმანიამ მადრიდს 1995 წელს ესპანეთში „ლეოპარდების“ წარმოების კონტრაქტის პრელუდიის სახით მიჰყიდა. ბიუჯეტის დეფიციტის გამო, ტანკებმა საბოლოოდ „დრენაჟის“ პროცესი გაიარეს (აკუმულატორების, ზეთების და მომავალში გამოსაყენებელი ნებისმიერი სხვა კომპონენტის მოხსნა). ისინი დაახლოებით 10 წელია „ჰიბერნაციაში“ არიან სარაგოსას ბაზაზე.
გარდა ამისა, ესპანეთმა უკრაინის „ლეოპარდის“ ტიპის ტანკების ეკიპაჟების მომზადება შესთავაზა. წყაროების ცნობით, წვრთნები თავდაპირველად ლატვიაში გაიმართება, სადაც ესპანეთის არმიამ 500 ჯარისკაცისგან შემდგარი კონტინგენტი განალაგა ექვსი „ლეოპარდის 2E“ ტიპის ტანკით. მეორე ფაზაში უკრაინული ტანკების ეკიპაჟების წვრთნა ესპანეთში ჩატარდება.
გამოცემა წერს, რომ მადრიდი უკვე ასრულებს MBDA Shorad Aspide-ის მოკლე რადიუსის საზენიტო სარაკეტო ბატარეების (სავარაუდოდ, Aspide 2000 - რედ.) კიევში მიწოდებას, რომლებიც ესპანეთის არმიამ უფრო მოწინავე სისტემით ჩაანაცვლა.
საჰაერო თავდაცვის სარაკეტო სისტემისა და ტანკების ეკიპაჟის წვრთნის საკითხი წამოიჭრა, როდესაც ესპანეთის პრემიერ-მინისტრი პედრო სანჩესი 21 აპრილს კიევში ჩავიდა პრეზიდენტ ვოლოდიმირ ზელენსკისთან შესახვედრად. იმავე დღეს, სამხედრო გემი „ისაბელ“ ელ ფეროლიდან გავიდა 200 ტონა საბრძოლო მასალით და სარაკეტო მხარდაჭერით. ასევე გადაიტანეს პოლონეთიდან უკრაინაში მასალების სწრაფი მიწოდების ოცდაათი პლატფორმა.
აქამდე ესპანეთი უკრაინას ამარაგებდა საბრძოლო მასალით, პირადი დამცავი აღჭურვილობით და მსუბუქი შეიარაღებით, როგორიცაა S-90 ყუმბარმტყორცნები და ტყვიამფრქვევები.
მადრიდში უკრაინის ელჩმა, სერგეი პოჰორეცევმა, ესპანეთს დახმარებისთვის მადლობა გადაუხადა, თუმცა დასძინა, რომ უკრაინის შეიარაღებულ ძალებს რაც შეიძლება მეტი „ლეოპარდის“ ტიპის რაკეტა, ხომალდსაწინააღმდეგო და ჰაერსაწინააღმდეგო რაკეტა, 155 მმ-იანი ჰაუბიცები და 120 მმ-იანი ნაღმტყორცნები სჭირდებათ. მან ადრე წუხილი გამოთქვა იმის გამო, რომ ესპანეთი „მის თავდაცვის ბიუჯეტთან შედარებით სამხედრო დახმარების ერთ-ერთ ყველაზე დაბალ მაჩვენებელს“ უზრუნველყოფს.
