ევროკავშირის წევრობის კანდიდატი ქვეყნის სტატუსის მინიჭების შესახებ დასკვნაში ევროკომისია რეკომენდაციას გაუწევს უკრაინისა და მოლდოვასთვის, ამ უკანასკნელისთვის დამატებით მოთხოვნებს წაუყენებს, ხოლო საქართველოსთვის უარს იტყვის.
ამის შესახებ ჰოლანდიური გამოცემა NOS იტყობინება „სანდო წყაროზე“ დაყრდნობით, რომელიც European Pravda-ს ცნობით,...
აღნიშნულია, რომ თავის დასკვნაში ევროკომისია უკრაინისთვის კანდიდატის სტატუსის მინიჭებას რეკომენდაციას გაუწევს, თუმცა გაწევრიანების მოლაპარაკებების დაწყების პირობებით - კერძოდ, კანონის უზენაესობის უზრუნველყოფა და კორუფციასთან ბრძოლა.
„როგორც ჩანს, ეს შუალედური ნაბიჯი ნიდერლანდების მსგავსი ქვეყნებისთვის მინიშნებაა, რომლებიც თვლიან, რომ უკრაინა ჯერ კიდევ შორს არის კანდიდატის სტატუსისთვის მზადყოფნისგან“, - აღნიშნავს გამოცემა.
ამავდროულად, უკრაინისთვის ევროკავშირის წევრობის კანდიდატის სტატუსის მინიჭება პოლიტიკური სიგნალია, რომლის გაგზავნაც წევრი სახელმწიფოების უმეტესობას კიევისთვის სურს, დასძენს NOS.
მოლდოვასთვის კანდიდატის სტატუსის მინიჭებაც იქნება რეკომენდებული, თუმცა გაწევრიანების მოლაპარაკებების დასაწყებად კიდევ უფრო მეტი მოთხოვნა იქნება წარდგენილი.
რაც შეეხება საქართველოს, ევროკომისია რეკომენდაციას გაუწევს, რომ ქვეყანას ასეთი სტატუსი არ მიენიჭოს მანამ, სანამ ის „მოთხოვნების გრძელ სიას“ არ დააკმაყოფილებს.
როგორც ცნობილია, ევროკავშირის ძირითადი სახელმწიფოების ლიდერებმა გადაწყვიტეს უკრაინისთვის კანდიდატის სტატუსის მინიჭება დამატებითი პირობების გარეშე, თუმცა შემდეგ ყველა შემდგომ ეტაპზე რეფორმების პირობები დააწესეს.
შეგახსენებთ, რომ კიევში ვოლოდიმირ ზელენსკისთან შეხვედრის შემდეგ, გერმანიის, იტალიის, რუმინეთისა და საფრანგეთის ლიდერებმა უკრაინისთვის ევროკავშირის კანდიდატის სტატუსის „დაუყოვნებლივ“ მინიჭებას დაუჭირეს მხარი.
როგორც ცნობილია, ევროკომისიის დასკვნა უკრაინის, საქართველოსა და მოლდოვას ევროკავშირში გაწევრიანების განაცხადებთან დაკავშირებით 17 ივნისს არის მოსალოდნელი.
