რუსეთის არმიამ დღეს ოდესაზე მორიგი თავდასხმა განახორციელა. ამჯერად, საზღვაო პორტი „კალიბრის“ ტიპის ფრთოსანი რაკეტებით დაიბომბა, იტყობინება უკრაინის თავდაცვის სამინისტროს სამხრეთ ოპერატიული სარდლობა.
სააგენტოს განცხადებაში აღნიშნულია, რომ ორი რაკეტა საჰაერო თავდაცვის სისტემებმა ჩაჭრა, ხოლო ორი სხვა პორტის ინფრასტრუქტურას მოხვდა, რამაც იქ ხანძარი გამოიწვია.
უკრაინის საჰაერო თავდაცვის ძალების პრესსპიკერის, იური იგნატის თქმით, სარაკეტო დარტყმა ოდესის პორტის იმ ნაწილს დაუმიზნა, სადაც მარცვლეული ინახებოდა. უკრაინის აგრარული პოლიტიკის სამინისტრომ განაცხადა, რომ მარცვლეულის გატანა უახლოეს მომავალში იგეგმებოდა.
თავის მხრივ, უკრაინის საგარეო საქმეთა სამინისტრომ, ოდესის პორტის დღევანდელი დაბომბვის კომენტირებისას, განაცხადა, რომ რუსეთს 24 საათზე ნაკლები დასჭირდა სტამბოლის შეთანხმებაში „მარცვლეულის დერეფნის“ შესახებ გაეროსთან და თურქეთთან მიღწეული შეთანხმებების კითხვის ნიშნის ქვეშ დასაყენებლად.
„რუსული რაკეტა ვლადიმერ პუტინის დარტყმაა გაეროს გენერალური მდივნის ანტონიო გუტიერეშისა და თურქეთის პრეზიდენტის, რეჯეფ თაიფ ერდოღანის წინაშე, რომლებმაც უზარმაზარი ძალისხმევა გაიღეს შეთანხმების მისაღწევად და ვისი მადლიერიც არის უკრაინა“, - დაწერა სოციალურ ქსელში უკრაინის საგარეო საქმეთა სამინისტროს წარმომადგენელმა ოლეჰ ნიკოლენკომ.
ამასობაში, სამხრეთის თავდაცვის ძალების პრეს-კოორდინაციის ცენტრის ხელმძღვანელმა ნატალია გუმენიუკმა განაცხადა, რომ ოდესის საზღვაო სავაჭრო პორტში მარცვლეულის საწყობი სარაკეტო თავდასხმის შედეგად არ დაზიანებულა.
გუშინ, 22 ივლისს, უკრაინისა და რუსეთის წარმომადგენლებმა გაეროსა და თურქეთის წარმომადგენლებთან ერთად ხელი მოაწერეს ორ ცალკეულ შეთანხმებას უკრაინული მარცვლეულის ექსპორტის აღდგენის შესახებ. სტამბოლის შეთანხმება არ ითვალისწინებს უკრაინის პორტების სრულ განაღმვას. გემების გადაადგილებისთვის უსაფრთხო დერეფნების შექმნა იყო დაგეგმილი. გაერომ განაცხადა, რომ საზღვაო მიმოსვლა შესაძლოა რამდენიმე კვირაში აღდგეს.
