ფონდმა მოუწოდა დაუყოვნებლივ ცეცხლის შეწყვეტისა და ბავშვთა დაცვის მიზნით საერთაშორისო ჰუმანიტარული სამართლის ვალდებულებების პატივისცემისკენ.
გაეროს ბავშვთა ფონდი (UNICEF) გმობს დონეცკის ოლქის მარიუპოლში, სამშობიარო სახლზე 9 მარტს განხორციელებულ თავდასხმას.
ამის შესახებ ფონდის პრესსამსახურმა განაცხადა, იუწყება რადიო თავისუფლება.
„შოკირებული ვარ მარიუპოლში სამშობიარო სახლზე დღევანდელი თავდასხმის ამბით. როგორც ამბობენ, თავდასხმის შედეგად დანგრეული შენობების ნანგრევების ქვეშ მცირეწლოვანი ბავშვები და მშობიარე ქალები არიან მოყოლილი... მშვიდობიან მოსახლეობაზე და სამოქალაქო ინფრასტრუქტურაზე - კერძოდ, საავადმყოფოებზე, წყლის ობიექტებსა და სკოლებზე - თავდასხმები მიუღებელია და დაუყოვნებლივ უნდა შეწყდეს. იუნისეფი კიდევ ერთხელ იმეორებს მოწოდებას ცეცხლის დაუყოვნებლივ შეწყვეტისკენ და მოუწოდებს საერთაშორისო ჰუმანიტარული სამართლით გათვალისწინებული ვალდებულებების შესრულებისკენ ბავშვთა დაცვის მიზნით, ასევე ჰუმანიტარული ორგანიზაციებისთვის უსაფრთხოდ და სწრაფად უზრუნველყოს გაჭირვებული ბავშვების დახმარება“, - განაცხადა იუნისეფის აღმასრულებელმა დირექტორმა, კეტრინ მ. რასელმა.
თავის განცხადებაში მან დასძინა: „უკრაინის ბავშვებს დაუყოვნებლივ სჭირდებათ მშვიდობა!“.
როგორც UNIAN იტყობინება, 9 მარტს, მარიუპოლზე რუსეთის საჰაერო დარტყმის დროს, განადგურდა ქალაქის ცენტრში მდებარე სამშობიარო სახლი, ასევე საავადმყოფო, ბავშვთა განყოფილება და თერაპიის განყოფილება.
თავდასხმის შედეგად 17 ადამიანი დაშავდა.
