ბოლო დღეებში სოციალური მედიის მომხმარებლები აქტიურად განიხილავენ სამხრეთ იტალიაში, აპულიაში, მეთევზეთა სოფელ მონოპოლიში მდებარე ქალთევზას დიდებული ქანდაკების ფორმას. ქანდაკება მონოპოლიში, ლუიჯი როსოს სახელობის ხელოვნების სკოლის სტუდენტებმა შექმნეს და შემდეგ მეცნიერ რიტა ლევი-მონტალჩინის სახელობის მოედანზე დაამონტაჟეს.
ქანდაკება, რომელიც ოფიციალურად ჯერ არ გამჟღავნებულა, დაცინვის საგანი გახდა მას შემდეგ, რაც სოციალურ ქსელში მისი დამონტაჟების დროს გადაღებული ფოტოები გამოჩნდა, იუწყება The Guardian.
მსახიობმა ტიციანა სკიავარელიმ Facebook-ზე დაწერა, რომ მისმა მეგობარმა მონოპოლიდან „სამართლიანად გამოთქვა გაოცება ამ „ძეგლის“ გამო: „ის ჰგავს ქალთევზას ორი სილიკონის მკერდით და, უპირველეს ყოვლისა, უზარმაზარი უკანალით, რომელიც ქალთევზებს არასდროს ჰქონიათ. ყოველ შემთხვევაში, მე არ ვიცი“.
სკიავარელიმ ხაზგასმით აღნიშნა, რომ მას არანაირი პრეტენზია არ აქვს არც ხელოვნების სტუდენტების და არც ადგილობრივი საბჭოს მიმართ, რომელმაც ნამუშევარი შეუკვეთა. „თუმცა, ეს ნამუშევარი ძალიან სახალისოა... ვინ იცის, იქნებ კიდევ ერთი ტურისტული ღირსშესანიშნაობა გახდეს“, - დასძინა მან.
ლუიჯი როსოს სახელობის სამხატვრო სკოლის დირექტორმა, ადოლფო მარჩიანომ, დაიცვა ქანდაკება და განაცხადა, რომ ეს იყო „ხვება ფორმების მქონე ქალების აბსოლუტური უმრავლესობისადმი“. მან განმარტა, რომ მონოპოლის მერმა სტუდენტებს დაავალა ქალაქისთვის რამდენიმე ქანდაკების შექმნა, მათ შორის ერთი ზღვის თემატიკის.
„სტუდენტები შეიკრიბნენ და ქალთევზას იდეა მოიფიქრეს“, - განმარტა მარჩიანომ. „საბჭოს აჩვენეს მასშტაბური მოდელი და ის დამტკიცდა. შემდეგ გადაწყდა, რომ დასრულებული ქანდაკება მოედანზე დაემონტაჟებინათ“. მარჩიანო ამბობს, რომ მას არ სურს სტუდენტების შთაგონებაზე საუბარი, მაგრამ ნამუშევარს „რეალობის, ამ შემთხვევაში, ქალის სხეულის, გამოსახვად“ მიიჩნევს.
მან დაამატა: „თქვენ ხედავთ სატელევიზიო რეკლამებს ძალიან გამხდარი მოდელებით, მაგრამ ქალთევზა არის ხარკი ფიგურის მქონე ქალების დიდი უმრავლესობისთვის, განსაკუთრებით ჩვენს ქვეყანაში. ძალიან ცუდი იქნებოდა, თუ ძალიან გამხდარ ქალს გამოვსახავდით“.
მონოპოლიში მცხოვრებმა ბეპემ განაცხადა, რომ ქანდაკებამ, რომელიც მის გახსნამდე დაკეტილი იყო, ბოლო დღეებში დიდი დისკუსია გამოიწვია, ზოგიერთმა კი ის „ზედმეტად პროვოკაციულად“ შეაფასა. „სამწუხაროა, რადგან ხელოვნების სტუდენტები ქებას იმსახურებენ და არა კრიტიკას“, - თქვა მან.
სტუდენტებმა ასევე შექმნეს სამრეწველო უბედური შემთხვევების მსხვერპლთაადმი მიძღვნილი ქანდაკება, რომლის გახსნაც ორშაბათს იგეგმება. „ეს ქალთევზაზე ბევრად უფრო მნიშვნელოვანია“, - თქვა მარჩიანომ.
