სამშაბათს საღამოს, ინტერნეტში გავრცელდა უკიდურესად ძალადობრივი ვიდეო, სადაც ასახულია სამხედრო ფორმაში გამოწყობილი მამაკაცები, რომლებსაც თეთრი ლენტები აქვთ (რომლებიც, როგორც წესი, უკრაინაში რუსი ჯარისკაცების მიერ იდენტიფიკაციისთვის გამოიყენება), როგორ კვეთენ თავს ცოცხალ მამაკაცს, რომელსაც უკრაინული ემბლემების ფორმა ეცვა.
BBC-ს არ შეუძლია ვიდეოს ავთენტურობის დადასტურება და მასზე ბმულებს არ აქვეყნებს. 90-წუთიან ვიდეოში ადამიანების სახეები ნიღბებითაა დაფარული. ერთ-ერთი მამაკაცი, სავარაუდოდ რუსი ჯარისკაცი, რადიოთი ურთიერთობს და ინსტრუქციებს აძლევს მეორე ჯარისკაცს (რომელიც შემდეგ მკვლელობას დანით ახორციელებს).
ჩანაწერში ასევე ჩანს ორი მამაკაცი, რომლებიც კამერას უკრაინის ემბლემიანი ტყვიაგაუმტარ ჟილეტს უჭირავენ. სიკვდილით დასჯილი მამაკაცის ფორმაზე ყვითელი ლენტი (რომელსაც ომის დროს უკრაინელი ჯარისკაცები იყენებდნენ) ჩანს. ვიდეოში კაშკაშა მწვანე ფოთლები ჩანს, რაც იმაზე მიუთითებს, რომ ის შესაძლოა გარკვეული დროის წინ იყოს ჩაწერილი. ვიდეოს ონლაინ გამოქვეყნებიდან მალევე, უკრაინის პრეზიდენტის ადმინისტრაციის ხელმძღვანელმა, ანდრეი იერმაკმა, სოციალურ ქსელში დაწერა: „ყველაფერზე პასუხისმგებლობა და ანგარიშვალდებულება იქნება“. იერმაკმა ამ პოსტის მიზეზი არ დააკონკრეტა, თუმცა ზოგიერთი უკრაინული მედიასაშუალება ვარაუდობს, რომ ეს მკვლელობის ვიდეოს გამოქვეყნებაზე პასუხია.
