ახალი სისხლის სამართლის კოდექსი სამ წელიწადში ამოქმედდება.
ინდონეზიის პარლამენტმა დაამტკიცა ახალი სისხლის სამართლის კოდექსი, რომელიც კრძალავს ქორწინების გარეშე სექსს. ეს ეხება არა მხოლოდ ინდონეზიის მოქალაქეებს, არამედ უცხოელებსაც.
„როიტერის“ ცნობით, ამ კანონის დარღვევა ერთ წლამდე თავისუფლების აღკვეთით დაისჯება. აკრძალვა ქვეყნის ტროპიკული სანაპიროებიდან ტურისტების დაფრთხობის შესახებ შეშფოთების მიუხედავად მიიღეს.
„ახალი კოდექსი, რომელიც როგორც ინდონეზიელებზე, ასევე უცხოელებზე გავრცელდება, ასევე კრძალავს მარტოხელა წყვილებს ერთად ცხოვრებას. ის ასევე აკრძალავს პრეზიდენტის ან სამთავრობო ინსტიტუტების შეურაცხყოფას, სახელმწიფო იდეოლოგიის საწინააღმდეგო შეხედულებების გავრცელებას და დაუგეგმავი საპროტესტო აქციების ჩატარებას“, - წერს სააგენტო.
ახალი სისხლის სამართლის კოდექსი სამ წელიწადში ამოქმედდება. ამ დროის განმავლობაში ქვეყანა დამხმარე კანონმდებლობის შემუშავებას გეგმავს. კანონებმა პარლამენტში ყველა პოლიტიკური პარტიის მხარდაჭერა მიიღო.
ინდონეზიაში მრუშობა ამჟამად უკანონოა, მაგრამ ქორწინებამდე სექსი არა.
ინდონეზიის ტურიზმის ინდუსტრიის საბჭოს თავმჯდომარის მოადგილემ, მაულანა იუსრანმა, ახალი კოდექსი „სრულიად კონტრპროდუქტიული“ გამოაცხადა. მან აღნიშნა, რომ ინდონეზიის ტურიზმის სექტორმა პანდემიისგან აღდგენა ახლახან დაიწყო.
ინდონეზიაში აშშ-ის ელჩმა, სუნგ კიმმა, განაცხადა, რომ ამ ამბავმა შესაძლოა ქვეყანაში უცხოური ინვესტიციების, ტურიზმისა და მოგზაურობის შემცირება გამოიწვიოს.
„ინდივიდების პირადი გადაწყვეტილებების კრიმინალიზაცია მნიშვნელოვან გავლენას მოახდენს მრავალი კომპანიის გადაწყვეტილების მატრიცაზე, რომლებიც წყვეტენ ინდონეზიაში ინვესტირების განხორციელებას“, - თქვა მან.
ამავდროულად, ინდონეზიის იუსტიციის სამინისტროს წარმომადგენელმა ალბერტ არიესმა განაცხადა, რომ ახალი კანონების მიზანია „ქორწინების ინსტიტუტისა და ინდონეზიური ღირებულებების დაცვა“.
ინდონეზიის საკამათო კანონი ქორწინების გარეშე სექსის შესახებ
ინდონეზიაში ქორწინების გარეშე სექსის კრიმინალიზაციის გეგმები პირველად 2019 წელს განიხილეს. ეს კანონი ფაქტობრივად კრძალავს ერთსქესიანთა ურთიერთობებს.
კანონის განხილვა 2020 წელს იგეგმებოდა, თუმცა პანდემიის გამო მისი განხილვა 2022 წლამდე გადაიდო.
