პრეზიდენტი ვოლოდიმირ ზელენსკი მიიჩნევს, რომ აღმოსავლეთ უკრაინაში დაძაბულობის ესკალაციით რუსეთი დასავლეთს გამოცდას უწევს და მის დაშინებას ცდილობს.
„ევროპული პრავდას“ ცნობით, უკრაინის პრეზიდენტმა ეს დონბასში ბოლო ვიზიტის დროს ჟურნალ „Time“-ისთვის მიცემულ კომენტარში განაცხადა.
„მათ სურთ, რომ სიტუაცია იმდენად აამაღლონ, რომ აჩვენონ, რომ დასავლეთი უკრაინის მხარდაჭერაში მერყეობს, რომ ისინი ჩვენ პარტნიორად ნამდვილად არ აღიქვამენ. ეს ერთგვარი გამოცდაა“, - თქვა ზელენსკიმ.
„მათ სურთ, რომ დასავლეთს რუსეთის სიძლიერის, მისი ძალაუფლების შიში ჰქონდეს... ამაში დიდი საიდუმლო არ არის“, - აღნიშნა უკრაინის პრეზიდენტმა.
შეგახსენებთ, რომ დონბასში ვითარების ესკალაციისა და საზღვარზე რუსული ძალების განლაგების გამო, უკრაინამ უკრაინა-ნატოს კომისიის საგანგებო სხდომა მოიწვია. სხდომა 13 აპრილს ბრიუსელში, საგარეო საქმეთა მინისტრის, დმიტრო კულებას მონაწილეობით გაიმართება.
კულება გეგმავს ნატოს პარტნიორებთან მოლაპარაკებას უკრაინისთვის შესაძლო პრაქტიკული მხარდაჭერის შესახებ რუსული აგრესიის ესკალაციის შემთხვევაში.
ევროკავშირმა და დიდი შვიდეულის წევრებმა ორშაბათს მოითხოვეს, რომ რუსეთმა შეწყვიტოს პროვოკაციები უკრაინის საზღვრებთან.
