პოლონეთის სეიმმა ხუთშაბათს მხარი დაუჭირა ინიციატივას, რომლის მიხედვითაც ვარშავაში არსებული პოლონეთ-რუსეთის დიალოგისა და ურთიერთგაგების ცენტრი გარდაიქმნება ინსტიტუციად, რომელიც პოლონელებსა და აღმოსავლეთ ევროპის ქვეყნებს შორის ურთიერთგაგების ხელშეწყობაზე იმუშავებს.
ამის შესახებ ინფორმაციას გამოცემა „ევროპული პრავდა“ RAR-ზე დაყრდნობით ავრცელებს.
გადაწყვეტილებას მხარი 445-მა დეპუტატმა დაუჭირა, წინააღმდეგ არცერთმა არ მისცა ხმა, ხოლო ერთმა პარლამენტარმა თავი შეიკავა.
იულიუს მიეროშევსკის დიალოგის ცენტრი ვარშავაში პოლონეთ-რუსეთის დიალოგისა და ურთიერთგაგების ცენტრს ჩაანაცვლებს. მისი მიზანია პოლონელებსა და აღმოსავლეთ ევროპის ხალხებს - კერძოდ, უკრაინელებს, ბელარუსებს, ქართველებს, მოლდოველებსა და რუსებს შორის ურთიერთგაგების ხელშეწყობა.
ინსტიტუტი ასევე შეეცდება, დასავლეთ ევროპის წარმომადგენლებს რუსეთში არსებული ვითარების შესახებ პოლონური პერსპექტივა მიაწოდოს, განმარტა პოლონეთის კულტურის მინისტრის მოადგილემ, იაროსლავ სელინმა, ინიციატივის სეიმში წარდგენისას.
აღსანიშნავია, რომ ახალი ცენტრის შექმნას მხარი დაუჭირეს დისკუსიაში მონაწილე სეიმას ყველა ჯგუფის დეპუტატებმა.
იულიუს მიეროშევსკი იყო XX საუკუნის პოლონელი ჟურნალისტი, პუბლიცისტი, მწერალი და მთარგმნელი, რომელიც ცნობილი იყო ნაცისტური გერმანიის პოლიტიკის კრიტიკული ნაშრომებით და პოლონეთის, უკრაინის, ლიტვისა და ბელორუსის ხალხებს შორის შერიგების იდეის მომხრედ.
