ევროპა განიხილავს ჰელსინკიდან ტალინამდე გასავლელი ყველაზე გრძელი წყალქვეშა რკინიგზის გვირაბის მშენებლობის გაუქმებას. Bloomberg-ის ცნობით, ესტონეთის ხელისუფლებამ პროექტის მიზანშეწონილობასთან დაკავშირებით ეჭვი გამოთქვა.
„სახელმწიფოსთვის ამჟამად ხელმისაწვდომი ინფორმაციის გათვალისწინებით, ჩვენ გვაქვს საფუძველი, ეჭვი შევიტანოთ ამ პროექტის მიზანშეწონილობაში გარემოსდაცვითი, ეკონომიკური და უსაფრთხოების მიზეზების გამო“, - განაცხადა ესტონეთის სახელმწიფო ადმინისტრირების მინისტრმა იააკ ააბმა.
მშენებლობას ფინეთის „ფინესტ ბეი არეას“ უნდა განეხორციელებინა, თუმცა ესტონეთი დაფინანსების წყაროებთან დაკავშირებით არ არის დარწმუნებული. მშენებლობის დაფინანსება ჩინეთიდან იყო მოსალოდნელი, თუმცა ტალინმა ეს უცხოური ინვესტიციების პოლიტიკური ექსპლუატაციისა და ტექნოლოგიური დამოკიდებულების პოტენციალის საფრთხედ მიიჩნია. ესტონეთის ხელისუფლება ხაზს უსვამს, რომ „ფინესტ ბეი არეამ“ არაერთხელ განმარტა პროექტი, თუმცა დაფინანსების საკითხი რამდენიმე წელია გაურკვეველი რჩება. თუმცა, კომპანია ირწმუნება, რომ დაფინანსება კერძო წყაროებიდან იქნება მიღებული და ეს არ საჭიროებს ესტონეთის ან ფინეთის სახელმწიფო დაფინანსებას.
წყალქვეშა გვირაბის მშენებლობა ფინეთისა და ესტონეთის დედაქალაქებს უნდა დაეკავშირებინა. მისი საერთო სიგრძე 103 კილომეტრი იყო, ხოლო წყალქვეშა გვირაბის სიგრძე 50-დან 56 კილომეტრამდე მერყეობდა. გარდა ამისა, საჭირო იქნებოდა მინიმუმ ერთი ხელოვნური კუნძულის მშენებლობა, რაც 17 მილიარდი დოლარი დაჯდებოდა.
