რუსეთის შემოჭრის საფრთხის ფონზე, ევროპარლამენტის დელეგაცია უკრაინაში გაიგზავნება მიმდინარე კრიზისის შესახებ ინფორმაციის შესაგროვებლად.
ამის შესახებ ინფორმაციას RBC-Ukraine ევროპარლამენტის ვებსაიტზე დაყრდნობით ავრცელებს.
ევროპარლამენტის რვა წევრისგან შემდგარი მაღალი დონის დელეგაცია, როგორც ამბობენ, უკრაინას 30 იანვრიდან 2 თებერვლამდე ეწვევა. ფაქტების დამდგენი მისია საგარეო საქმეთა კომიტეტის თავმჯდომარე დევიდ მაკალისტერის და უსაფრთხოებისა და თავდაცვის ქვეკომიტეტის თავმჯდომარე ნატალი ლუაზოს ხელმძღვანელობს.
„30 იანვრიდან 2 თებერვლამდე ვიზიტის დროს, წევრები ადგილზე დააკვირდებიან სიტუაციას და გამოხატავენ ევროპარლამენტის სოლიდარობას უკრაინელი ხალხის მიმართ და უარყოფენ რუსეთის მიერ კრიზისის შემდგომი ესკალაციისკენ გადადგმულ ნებისმიერ ნაბიჯს“, - ნათქვამია განცხადებაში.
დელეგაცია შეხვდება უკრაინის ვერხოვნა რადას სპიკერს რუსლან სტეფანჩუკს და ასევე ითხოვს შეხვედრებს პრეზიდენტ ვოლოდიმირ ზელენსკისთან, პრემიერ-მინისტრ დენის შმიხალთან და საგარეო საქმეთა და თავდაცვის მინისტრებთან.
ევროპარლამენტარები ასევე გამართავენ მოლაპარაკებებს ეროვნული უშიშროებისა და თავდაცვის საბჭოს მდივანთან, ალექსეი დანილოვთან და ვერხოვნა რადას რამდენიმე კომიტეტის წევრებთან.
შეგახსენებთ, რომ აშშ-ის სახელმწიფო მდივნის მოადგილემ ვენდი შერმანმა ადრე განაცხადა, რომ რუსეთის პრეზიდენტ ვლადიმერ პუტინს შეუძლია ჯარები გამოიყენოს უკრაინაში შესაჭრელად ახლა ან თებერვლის შუა რიცხვებში.
აშშ-ის პრეზიდენტმა ჯო ბაიდენმა განაცხადა, რომ უკრაინაში შეჭრის შემთხვევაში აშშ რუსეთის წინააღმდეგ სანქციებს დააწესებს და რომ შეზღუდვებმა შესაძლოა პირადად პუტინზე იმოქმედოს.
