ევროკავშირმა კიდევ ერთხელ უარი თქვა რუსეთთან საზღვრების გახსნაზე. ამის შესახებ „რია ნოვოსტიმ“ ხუთშაბათს, 15 ოქტომბერს, გაავრცელა ინფორმაცია.
სააგენტოს წყაროს ცნობით, ევროკავშირის საბჭომ უცვლელი დატოვა იმ ქვეყნების სია, რომლებთანაც გარე საზღვრების გახსნაა შესაძლებელი და რომელიც ყოველ ორ კვირაში ერთხელ განახლდება.
ამგვარად, სიაში კვლავ 11 ქვეყანაა: ავსტრალია, ახალი ზელანდია, კანადა, იაპონია, სამხრეთ კორეა, საქართველო, რუანდა, ტუნისი, ტაილანდი, ურუგვაი და ჩინეთი (საზღვრების გახსნის საკითხში ორმხრივი ურთიერთშეთანხმების დადასტურების პირობით).
ამ ქვეყნების შერჩევის კრიტერიუმები იყო თითოეულ მათგანში ეპიდემიოლოგიური მდგომარეობა და ეპიდემიის შეკავების ზომები, ასევე „ეკონომიკური და სოციალური მოსაზრებები“.
ადრე გავრცელდა ინფორმაცია, რომ რუსეთი 1 ნოემბრიდან აღადგენდა სამგზავრო საჰაერო მიმოსვლას სერბეთთან, კუბასთან და იაპონიასთან. ამჟამად რუსი ტურისტებისთვის ღიაა თურქეთი, არაბთა გაერთიანებული საამიროები, მალდივის კუნძულები, ეგვიპტე, ტანზანია, ბელარუსი, გაერთიანებული სამეფო, შვეიცარია, სამხრეთ კორეა, ყაზახეთი და ყირგიზეთი.
