ევროკომისიამ გაზარდა ახალი კორონავირუსის (COVID-19) რისკის შეფასება ევროკავშირის წევრ სახელმწიფოებში, რადგან ევროკავშირში ინფიცირების მაჩვენებლის გაუარესებაა მოსალოდნელი. ამის შესახებ ევროკომისარმა ურსულა ფონ დერ ლაიენმა ორშაბათს, 2 მარტს, ბრიუსელში გამართულ პრესკონფერენციაზე განაცხადა.
„ჩვენმა სააგენტომ დღეს გამოაცხადა, რომ რისკი საშუალოდან მაღალზე გაიზარდა“, - ციტირებს მის სიტყვებს TASS.
ფონ დერ ლაიენის თქმით, ევროკავშირი ყველა ზომას იღებს COVID-2019-ის გავრცელების თავიდან ასაცილებლად, თუმცა ევროპის ქვეყნებში კორონავირუსთან დაკავშირებული სიტუაცია გაუარესდება.
მან ასევე ხაზგასმით აღნიშნა, რომ ევროკომისიამ დაავადებასთან საბრძოლველად 230 მილიონ ევროზე მეტი გამოყო და დასძინა, რომ ევროკომისია ამჟამად დამატებითი დაფინანსების მოზიდვის შესაძლებლობებს ეძებს.
ახალი კორონავირუსის, COVID-2019-ის აფეთქება დეკემბრის ბოლოს ჩინეთის ქალაქ უხანში დაფიქსირდა. ინფექცია სხვა ქვეყნებშიც გავრცელდა, ყველაზე მძიმე შემთხვევები კი იტალიაში, სამხრეთ კორეასა და ირანში დაფიქსირდა.
2 მარტის მონაცემებით, კორონავირუსით გარდაცვლილთა რიცხვმა 3057-ს მიაღწია. სულ 89083-ზე მეტი ადამიანი დაინფიცირდა, ხოლო 45163 გამოჯანმრთელდა.
ჯანმო აფრთხილებს, რომ ამჟამინდელი სიტუაცია შესაძლოა „მხოლოდ აისბერგის მწვერვალი“ იყოს — ორგანიზაციის პროგნოზით, მსოფლიო მოსახლეობის 66%-მდე შეიძლება დაინფიცირდეს კორონავირუსით, იმ პირობით, რომ ერთი პაციენტი მხოლოდ ორ ან სამ სხვა პაციენტს დააინფიცირებს.
