იტალიის პრემიერ-მინისტრმა მარიო დრაგიმ განაცხადა, რომ გადადგომის შესახებ განცხადებას რესპუბლიკის პრეზიდენტს დღეს საღამოს წარუდგენს, იტყობინება Rai News.
„პარლამენტში ჩემს საინაუგურაციო სიტყვაში ვთქვი, რომ აღმასრულებელი ხელისუფლება მხოლოდ იმ შემთხვევაში წავა წინ, თუ იქნება მთავრობის პროგრამის განხორციელების მკაფიო პერსპექტივა, რომელსაც პოლიტიკურმა ძალებმა მისცეს ხმა“, - განაცხადა დრაგიმ.
დრაგის მთავრობის მომავალი კითხვის ნიშნის ქვეშ დადგა მას შემდეგ, რაც კოალიციურმა პარტნიორმა „ხუთმა ვარსკვლავმა“ ნდობის ვოტუმის კენჭისყრიდან გამოსვლა გადაწყვიტა.
„ხუთი ვარსკვლავის“ ლიდერმა, ჯუზეპე კონტემ, პრემიერ-მინისტრი დაადანაშაულა იმაში, რომ საკმარისად არ აკეთებს ენერგომატარებლების ფასების ზრდით გამოწვეული სოციალური კრიზისის მოსაგვარებლად. „ხუთმა ვარსკვლავმა“ უარი თქვა იტალიელებისთვის მთავრობის დახმარების კანონპროექტზე ხმის მიცემაზე გარკვეული პუნქტების შეუთანხმებლობის გამო.
„ხუთი ვარსკვლავის“ ბოიკოტის მიუხედავად, დახმარების პაკეტი იტალიის სენატმა დაამტკიცა. თუმცა, დრაგიმ არაერთხელ განაცხადა, რომ ის მხოლოდ ეროვნული ერთიანობის მთავრობას უხელმძღვანელებს და არ გააგრძელებს მუშაობას „ხუთი ვარსკვლავის“ პარტიის გარეშე, რომელიც გასულ თვეში განხეთქილებამდე პარლამენტში ყველაზე დიდი პარტია იყო.
