დიდი ბრიტანეთის პრემიერ-მინისტრმა ბორის ჯონსონმა უკრაინისთვის 120 ჯავშანტექნიკისა და ახალი ხომალდსაწინააღმდეგო სარაკეტო სისტემების სახით ახალი სამხედრო დახმარების შესახებ განაცხადა, იტყობინება ბრიტანეთის მთავრობის პრესსამსახური.
ჯონსონი ამჟამად კიევში სამუშაო ვიზიტით იმყოფება. დღეს მან მოლაპარაკებები გამართა პრეზიდენტ ვოლოდიმირ ზელენსკისთან.
„პრემიერ-მინისტრმა გამოაცხადა ახალი სამხედრო დახმარების შესახებ 120 ჯავშანტექნიკისა და ახალი ხომალდსაწინააღმდეგო სარაკეტო სისტემების სახით, რათა მხარი დაუჭიროს უკრაინას ამ კრიტიკულ ეტაპზე, რადგან რუსეთის უკანონო შემოჭრა გრძელდება“, - ნათქვამია დიდი ბრიტანეთის მთავრობის განცხადებაში.
ეს იარაღი უზრუნველყოფილი იქნება 100 მილიონი ფუნტის ღირებულების მაღალი ხარისხის სამხედრო აღჭურვილობის გარდა, მათ შორის Starstreak-ის საზენიტო რაკეტების, 800 ტანკსაწინააღმდეგო რაკეტის და მაღალტექნოლოგიური, ზუსტი დარტყმებისთვის განკუთვნილი საბრძოლო მასალის დამატებით.
ჯონსონმა ასევე დაადასტურა უკრაინისთვის ეკონომიკური მხარდაჭერის გაგრძელება და მსოფლიო ბანკის სესხების სახით დამატებით 500 მილიონი დოლარის გამოყოფა გარანტირებულია. ეს, დიდი ბრიტანეთის 394 მილიონი ფუნტის ოდენობის გრანტის დახმარებასთან ერთად, უკრაინაში სასიცოცხლოდ მნიშვნელოვანი ჰუმანიტარული მომსახურების მხარდაჭერას შეუწყობს ხელს.
დიდმა ბრიტანეთმა ასევე უპასუხა უკრაინის მთავრობის მოთხოვნას უკრაინიდან იმპორტირებული პროდუქციის აბსოლუტურ უმრავლესობაზე ტარიფების ლიბერალიზაციისა და საბაჟო შეღავათების დაწესებით.
