ევროპაში COVID-19-ის ახალი შემთხვევების რაოდენობამ ერთ დღეში პირველად 100 000-ს გადააჭარბა, - ამის შესახებ ჯანდაცვის მსოფლიო ორგანიზაციამ განაცხადა.
ამ ფონზე, ევროკავშირის მრავალი ქვეყანა ახალი საკარანტინო ზომების შემოღებაზე მსჯელობს, სულ მცირე ყველაზე დაზარალებულ რეგიონებში. ეს საზოგადოების უკმაყოფილებას იწვევს.
შაბათს ვარშავაში, ლონდონსა და რომში მასობრივი საპროტესტო აქციები გაიმართა. ამ ქალაქებში ათასობით ადამიანი გამოვიდა ქუჩებში და გააპროტესტა პირბადის ტარების სავალდებულო წესი, რესტორნების დახურვა, სკოლებისა და საჯარო ღონისძიებების გაუქმება. მომიტინგეები აცხადებენ, რომ ასეთი ზომები არღვევს მოქალაქეთა უფლებებს და უარყოფითად მოქმედებს ეკონომიკაზე.
და მაინც, ყველა ნიშანი იმაზე მიუთითებს, რომ ევროპაში COVID-19-ის მეორე ტალღა დადგა. იტალიაში ყოველდღიურად 5000 ახალი შემთხვევა ფიქსირდება. დიდ ბრიტანეთში ეს მაჩვენებელი ორჯერ მეტია. შემთხვევები განსაკუთრებით მაღალია ინგლისის ჩრდილოეთით, შოტლანდიაში, ჩრდილოეთ ირლანდიასა და უელსის რამდენიმე რეგიონში. გარდაცვლილთა რიცხვიც იზრდება, თუმცა არა ისე სწრაფად, როგორც ეს გაზაფხულზე პანდემიის პიკის დროს მოხდა.
გერმანიის დედაქალაქის მერმა, მიხაელ მიულერმა, პარასკევს ბერლინში კორონავირუსთან დაკავშირებული დაძაბული ვითარების შესახებ განაცხადა და ინფექციისგან თავის დასაცავად უფრო მკაცრი ზომების მიღებისკენ მოუწოდა.
რუსეთში კორონავირუსით ინფიცირების დღიური ზრდა 12 126-ს შეადგენდა. ეს ეპიდემიის დაწყებიდან ყველაზე მაღალი მაჩვენებელია. წინა ყველაზე მაღალი დღიური ზრდა 11 მაისს დაფიქსირდა (11 656).
