შეიძლება თუ არა კლიმატის ცვლილებამ გავლენა მოახდინოს სეზონურ მოდაზე? საცალო ვაჭრობის წარმომადგენლები გაყიდვების სეზონის გადადებას გეგმავენ.
არაპროგნოზირებადი ამინდი მოდის საცალო მოვაჭრეებს ტაქტიკის შეცვლას აიძულებს
თბილი ზამთარი, კოკისპირული წვიმები, გვალვა... ევროპის ამინდი ყოველთვიურად სულ უფრო არაპროგნოზირებადი ხდება. ექსპერტების თქმით, ამას კატასტროფული შედეგები მოაქვს როგორც ჯანმრთელობისთვის, ასევე სურსათის უვნებლობისთვის.
თუმცა, კლიმატი გავლენას ახდენს ჩვენი ყოველდღიური ცხოვრების სხვა ასპექტებზეც, განსაკუთრებით მოდასთან დაკავშირებულზე. რა ვიყიდოთ და რა ჩავიცვათ, როდესაც ზამთარი უფრო გაზაფხულს ჰგავს, შემოდგომა კი - ზაფხულს? თავის მხრივ, საცალო მოვაჭრეებისთვის სულ უფრო რთული ხდება მომხმარებლის ქცევის პროგნოზირება და იმის დადგენა, თუ როდის და რა გაყიდონ.
როგორ მოქმედებს კლიმატის ცვლილება მოდის ინდუსტრიაზე?
მიუხედავად იმისა, რომ ევროპის ზოგიერთი რეგიონი გვალვას განიცდის, ზოგან ძლიერი წვიმებია. შედეგად, „როიტერის“ ცნობით, იტალიელი საცალო ვაჭრობის კომპანიები OVS და Pianoforte Holding ზაფხულის გაყიდვების ივლისის შუა რიცხვებამდე გადადებას განიხილავენ.
გაყიდვების კალენდარს იტალიის რეგიონული ხელისუფლება განსაზღვრავს. ფასდაკლებების სეზონი, როგორც წესი, ივლისის დასაწყისში იწყება.
რადგან ზაფხული გვიანდება და გრძელდება, ტენდენცია შესაძლოა მთელ ძველ სამყაროში გავრცელდეს.
შეუძლია თუ არა ექსტრემალურ ამინდს სწრაფი მოდის შეფერხება?
არაპროგნოზირებადი ამინდის პირობებში, მომხმარებლები, შესაძლოა, უფრო მეტად მიდრეკილნი იყვნენ უფრო მრავალმხრივ ტანსაცმელში ინვესტიციის ჩადებისკენ, ვიდრე უახლესი მოდის ტენდენციების დევნაზე.
ამან შეიძლება ტექსტილის კომპანიები აიძულოს, შეწყვიტონ სეზონური ტანსაცმლის დიდი რაოდენობით წარმოება, რაც შეამცირებს ტექსტილის ნარჩენებს. ეს პლიუსია გარემოსთვის!
რამდენად მოქმედებს ამინდი ტანსაცმლის გაყიდვებზე?
მეტეოროლოგიური სამსახურისა და ბრიტანეთის საცალო ვაჭრობის კონსორციუმის მონაცემებით, ტემპერატურის ერთი გრადუსით მატება ქვეყანაში ქალის ტანსაცმლის გაყიდვებს 11 მილიონი ფუნტით (12.7 მილიონი ევროთი) ამცირებს.
ამინდს მნიშვნელოვანი გავლენა აქვს ტანსაცმლის მაღაზიების ტრაფიკზე. შვედური მარკეტინგული კომპანია Tradedoubler-ის მონაცემები აჩვენებს, რომ ონლაინ გაყიდვები მზიან ამინდში მცირდება, რადგან ადამიანები მაღაზიაში შოპინგით ტკბობას ამჯობინებენ, წვიმიან ამინდში კი პირიქით ხდება.
ექსტრემალური ამინდის პირობები გავლენას ახდენს მთელ მიწოდების ჯაჭვზე. გასულ წელს პაკისტანში დამანგრეველმა წყალდიდობამ ბამბის მოსავლის 40%-იანი დანაკარგი გამოიწვია.
არაპროგნოზირებადი ამინდი ასევე გავლენას ახდენს მიწოდების ჯაჭვებზე ჩინეთში, ინდოეთში, ბრაზილიასა და სხვა ქვეყნებში.
