კიევის ოლქში მდებარე ქალაქები ბუჩა და ირპინი თებერვლის ბოლოს რუსული არმიის შეტევის ზონაში აღმოჩნდნენ. არმიის უკან დახევის შემდეგ, ადგილობრივმა ხელისუფლებამ ასობით მშვიდობიანი მოქალაქის ცხედრის აღმოჩენის შესახებ განაცხადა, რომელთა მკვლელობაშიც რუს ჯარისკაცებს ადანაშაულებენ.
ადგილობრივი ექიმები, ნევროლოგი იგორ კოვალჩუკი და ტრავმატოლოგი ევგენი რეპეევი, საუბრობენ იმაზე, თუ როგორ ცხოვრობდნენ ისინი აქ იმ დროს და რას აკეთებდნენ ისინი და მათი პაციენტები.
„ყველა პაციენტი კრიტიკულ მდგომარეობაში იყო, რადგან სადისპეტჩერო სამსახური გათიშული იყო“, - ამბობს ევგენი რეპეევი. „ოკუპანტებმა სასწრაფო დახმარების მანქანებს დაჭრილების ასაყვანად გასვლაში ხელი შეუშალეს. ისინი, ვისაც დამოუკიდებლად სიარული შეეძლო, საავადმყოფოში მივიდნენ. ბევრი სამედიცინო დახმარების გარეშე დარჩა. ხალხი გვირეკავდა და გვეკითხებოდა: „რა ვქნა? ფეხი მაქვს დაჭიმული, ვორცელში ან გოსტომელში სარდაფში ვზივარ“.
იგორ კოვალჩუკი იხსენებს, როგორ მივიდა სამსახურში 24 თებერვალს, დილის შვიდ საათზე. მან დაინახა ვერტმფრენები, რომლებიც ქალაქის თავზე დაფრინავდნენ და გაიგონა აფეთქებების ხმა გოსტომელის აეროპორტში:
„მე მქონდა წასვლის შესაძლებლობა, როდესაც ისინი ბუჩას მიუახლოვდნენ, როდესაც ყველაფერი ახალი დაწყებული იყო. ეს შესაძლებლობა მათ აქ მოსვლამდეც მქონდა. მაგრამ ეს არ გავაკეთე; ვიცოდი, რომ ხალხის დასახმარებლად უნდა დავრჩენილიყავი. ამიტომ აქ 10 მარტამდე დავრჩი. რა თქმა უნდა, სხვაგვარად არ შემეძლო.
ყველა ექიმი და პაციენტი 10 და 11 მარტს ევაკუირებული იქნა. ევგენი რეპეევი, მისი ბევრი კოლეგის მსგავსად, საავადმყოფოში ერთი თვის შემდეგ დაბრუნდა. იმ დროისთვის ბუჩას, ირპენის, ბოროდიანკას და კიევის ოლქის სხვა ქალაქების სახელები უკრაინაში ომის დროს ჩადენილი ომის დანაშაულების სინონიმი გახდა.
