ბრიტანეთის მოქალაქე პოლ ური 10 ივლისს, ე.წ. „დპრ“-ში ტყვეობაში გარდაიცვალა. ამის შესახებ პარასკევს თვითგამოცხადებული რესპუბლიკის ომბუდსმენმა, დარია მოროზოვამ განაცხადა.
დონეცკში ურის „ბრიტანელ დაქირავებულ მეომრად“ მოიხსენიებენ. გარდაცვალების მიზეზად ქრონიკული დაავადება და სტრესი სახელდება.
მოროზოვამ განაცხადა, რომ ბრიტანეთის ხელისუფლებას, საერთაშორისო ორგანიზაციებს და უცხოურ მედიას მისი დატყვევების შესახებ ეცნობათ, თუმცა რეაგირება არ მოუხდენია.
არაკომერციული ორგანიზაცია „პრესიდიუმის ქსელის“ 45 წლის ბრიტანელი მოხალისე რუსმა სამხედროებმა 25 აპრილს, სამხრეთ-აღმოსავლეთ უკრაინის ქალაქ ზაპოროჟიეს მახლობლად მდებარე საკონტროლო-გამშვებ პუნქტზე დააკავეს. რუსული მხარე აცხადებდა, რომ ის „ცდილობდა დემოკრატიული რესპუბლიკის საკონტროლო-გამშვები პუნქტის გარღვევას“.
ის არ იყო იმ უცხოელ სამხედრო ტყვეებს შორის, რომლებსაც „დპრ“-ის ე.წ. უზენაესი სასამართლოს მიერ სიკვდილით დასჯა მიესაჯა „მერცენარიზმის“ და „დპრ“-ში ძალაუფლების ხელში ჩაგდებისა და „კონსტიტუციური წესრიგის“ დამხობისკენ მიმართული ქმედებებისთვის.
დონეცკის სახალხო რესპუბლიკაში (დპრ) ბრიტანელი პოლ ურის გარდაცვალებასთან დაკავშირებით, დიდი ბრიტანეთის საგარეო საქმეთა სამინისტრომ რუსეთის ელჩი ანდრეი კელინი დაიბარა, იუწყება Reuters. დიდი ბრიტანეთის საგარეო საქმეთა მინისტრმა აღნიშნა, რომ რუსეთს სრული პასუხისმგებლობა ეკისრება ბრიტანელი პოლ ურის ე.წ. „დპრ“-ში გარდაცვალებაზე
„შეძრწუნებული ვარ ბრიტანელი ჰუმანიტარული ორგანიზაციის თანამშრომლის, პოლ ურის გარდაცვალების შესახებ გავრცელებული ინფორმაციით, რომელიც უკრაინაში რუსეთის მარიონეტული ძალების მიერ იყო დაკავებული. რუსეთი ამ ყველაფერზე სრულად უნდა აგოს პასუხი“, - განაცხადა საგარეო საქმეთა მინისტრმა ლიზ ტრასმა.
