უკრაინაში სამხედრო ტექნიკის დანაკარგების კომპენსირების მიზნით, რუსეთმა ბელორუსის სამხედრო რეზერვებიდან ჯავშანტექნიკის გაყვანა დაიწყო, ნათქვამია დიდი ბრიტანეთის თავდაცვის სამინისტროს მიერ უკრაინაში არსებული ვითარების შესახებ მოხსენებაში.
ბოლო კვირების განმავლობაში რუსეთმა ბელორუსის რეზერვებიდან სულ მცირე ასი ტანკი და ქვეითი საბრძოლო მანქანა მიიღო.
დიდი ბრიტანეთის მონაცემებით, ოქტომბრის შუა რიცხვებში უკრაინაში რუსული ჯავშანტექნიკის საშუალოდ 40 ერთეულზე მეტი დანაკარგი დაფიქსირდა დღეში. Meduza-ს ცნობით, ეს დანაკარგები გაიზარდა უკრაინის შეიარაღებული ძალების კონტრშეტევის გამო რამდენიმე ფრონტზე.
როგორც დიდი ბრიტანეთის თავდაცვის სამინისტრო ხაზს უსვამს, ჯავშანტექნიკა და საარტილერიო დანაყოფები რუსეთის სამხედრო სტრატეგიის ცენტრალურ ნაწილს წარმოადგენს. ამჟამად, უკრაინაში მყოფი რუსი ჯარისკაცები სერიოზულ სირთულეებს განიცდიან, რადგან მათ არ შეუძლიათ სათანადოდ კომპენსირება გაუწიონ საბრძოლო ტექნიკის მნიშვნელოვან დანაკარგებს და საარტილერიო ჭურვების დეფიციტს.
რუსეთის თავდაცვის სამინისტრომ უკრაინის წინააღმდეგ ომში ტექნიკის დანაკარგების შესახებ ინფორმაცია ჯერ არ გაავრცელა.
მეორე მხრივ, დამოუკიდებელი ანალიტიკური პროექტის Oryx მონაცემები აჩვენებს, რომ რუსეთმა უკრაინაში 7500-ზე მეტი ერთეული ტექნიკა დაკარგა.
ამასობაში, ამერიკულმა გაზეთმა „The Wall Street Journal“-მა ოქტომბრის დასაწყისში გამოაქვეყნა ინფორმაცია, რომ რუსეთმა უკრაინაში იმაზე მეტი აღჭურვილობა და იარაღი დატოვა, ვიდრე ომის დროს რომელიმე დასავლურმა ქვეყანამ უკრაინას გადასცა.
