აშშ-ის თავდაცვის მდივანმა ლოიდ ოსტინმა პირველად საჯაროდ დაადასტურა, რომ არსებობს მტკიცებულება ჩრდილოეთ კორეის ჯარების რუსეთში ყოფნის შესახებ.
ევრონიუსის ცნობით , ოსტინმა განაცხადა, რომ მიუხედავად იმისა, რომ ჩრდილოეთ კორეელი ჯარისკაცების ზუსტი ქმედებები ჯერ კიდევ უცნობია, მათი რუსეთში ყოფნა კითხვებს ბადებს, რომლებიც დეტალურ შესწავლას საჭიროებს.
ეს კომენტარი აშშ-ს მხრიდან უკრაინისა და სამხრეთ კორეის განცხადებების პირველი ოფიციალური დადასტურება იყო. ერთი დღით ადრე, უკრაინის სამხედრო დაზვერვის ხელმძღვანელმა, კირილ ბუდანოვმა, განაცხადა, რომ ჩრდილოეთ კორეის ჯარების პირველი ქვედანაყოფები რუსეთის კურსკის ოლქში ჩასვლას ელოდებიან. მათი მთავარი მისია, სავარაუდოდ, უკრაინასთან დაპირისპირებაში რუსეთის მხარდაჭერა იქნება.
ბუდანოვმა ადრე განაცხადა, რომ პირველი ჯგუფი 2600 ჯარისკაცისგან შედგებოდა და რუსეთში ჩრდილოეთ კორეის ჯარისკაცების საერთო რაოდენობამ შესაძლოა 11 000-ს მიაღწიოს. უკრაინის პრეზიდენტმა ვოლოდიმირ ზელენსკიმ დასძინა, რომ ჩრდილოეთ კორეელი ოფიცრების ნაწილი უკვე უკრაინის ოკუპირებულ ტერიტორიებზე იმყოფება, სადაც ისინი შესაძლო საბრძოლო ოპერაციებისთვის წვრთნებს გადიან.
სამხრეთ კორეა განიხილავს უკრაინაში სადაზვერვო დანაყოფების გაგზავნას, რათა რუსეთ-უკრაინის კონფლიქტში მისი მონაწილეობის კონტექსტში, ფხენიანის ტაქტიკა და სამხედრო შესაძლებლობები უფრო დეტალურად გააანალიზონ.
