რეჟისორი ანდრეი ზვიაგინცევი, რომელმაც გადაიღო „ლევიათანი“, „უსიყვარულო“ და სხვა საერთაშორისო კინოფესტივალებზე ჯილდოს მფლობელი ფილმები, გადაიღებს „იუპიტერს“. გადაღებები 2024 წლის გაზაფხულზე საფრანგეთსა და ესპანეთში განხორციელდება, იტყობინება Variety 28 სექტემბერს.
გამოცემის ცნობით, ფილმი მოგვითხრობს რუსი ოლიგარქის ისტორიას, რომლის ოჯახიც შურისძიების მკაცრ რეალობას აწყდება. პროდიუსერები ფილმს აღწერენ, როგორც „ძალაუფლებისა და კორუფციის დაუნდობელ კვლევას“. თავად ზვიაგინცევი ამბობს, რომ „იუპიტერის“ ისტორია ამჟამინდელ პოლიტიკურ კონტექსტს გასცდება.
„აბსოლუტური ძალაუფლების ბუნება უნივერსალური თემაა და ამ პრიზმით შეგვიძლია შევხედოთ ნებისმიერ კულტურულ ლანდშაფტს ან ისტორიულ ეპოქას“, - ციტირებს მედია რეჟისორის სიტყვებს.
ზვიაგინცევი ფილმზე თავის მუდმივ თანამშრომლებთან, ოპერატორ მიხაილ კრიხმანთან და დამდგმელ დიზაინერ ანდრეი პონკრატოვთან ერთად იმუშავებს. ეს რეჟისორის პირველი სრულმეტრაჟიანი ფილმი იქნება 2021 წელს გადატანილი მძიმე ავადმყოფობის შემდეგ.
