საფრანგეთის საგარეო საქმეთა მინისტრმა ჟან-ივ ლე დრიანმა კიევში საფრანგეთის საელჩოს დაბრუნების შესახებ უკრაინელ კოლეგასთან, დმიტრო კულებასთან სატელეფონო საუბრისას განაცხადა. მან ვადები არ დააკონკრეტა, თუმცა აღნიშნა, რომ ეს ძალიან მალე მოხდება.
„დაბრუნება ძალიან მალე მოხდება და კიდევ უფრო გააძლიერებს საფრანგეთის მხარდაჭერას უკრაინის მიმართ რუსეთთან დაპირისპირებაში“, - ციტირებს გამოცემა ლე დრიანის სიტყვებს.
საუბრისას საგარეო საქმეთა მინისტრებმა განიხილეს საფრანგეთის დახმარება უკრაინაში რუსი ჯარების მიერ ჩადენილი დანაშაულების დოკუმენტირებისა და მტკიცებულებების შეგროვების საკითხებში. მინისტრებმა ასევე ისაუბრეს ჰუმანიტარულ ოპერაციებსა და სამხედრო დახმარების მიწოდებაზე.
ლე დრიანთან სატელეფონო საუბრის შესახებ თავის Twitter-ის გვერდზე კომენტარის გაკეთებისას, კულებამ დასძინა, რომ საფრანგეთი ევროკავშირის დონეზე მხარს უჭერს რუსეთის წინააღმდეგ ნავთობის ემბარგოს. საგარეო საქმეთა მინისტრმა ასევე შეაქო პარიზის გადაწყვეტილება კიევში ელჩის დაბრუნების შესახებ.
შეგახსენებთ, რომ საფრანგეთის საელჩო კიევიდან ლვოვში მარტის დასაწყისში, რუსეთის მიერ უკრაინის წინააღმდეგ ომის დაწყებიდან რამდენიმე დღეში გადავიდა.
აღსანიშნავია, რომ მას შემდეგ, რაც ოკუპანტები კიევიდან გავიდნენ, უკრაინის დედაქალაქში უცხო ქვეყნების საელჩოებმა დაბრუნება დაიწყეს. მოლდოვამ ამის შესახებ 13 აპრილს განაცხადა, ხოლო სლოვაკეთის მთავრობამ იგივე გააკეთა ერთი დღით ადრე.
