ურთიერთობის დანგრევით გამოწვეული ემოციური ტკივილი იმდენად ძლიერია, რომ მას კლინიკური სახელიც აქვს: სასიყვარულო ტრავმის სინდრომი (LTS), წერს The Guardian.
მათთვის, ვისაც გატეხილი გულის განკურნება სურს, დაახლოებით 400 ფუნტი სტერლინგის ღირებულების ყურსასმენი შეიძლება დაეხმაროს. კვლევები აჩვენებს, რომ მისი დღეში რამდენიმე წუთით ტარება ამსუბუქებს სტრესს, ნეგატიურ განწყობას და დეპრესიას.
კვლევაში, 36 მოხალისე, რომლებსაც SLT ჰქონდათ, ატარებდა მოწყობილობას, რომელიც მათ ტვინს მსუბუქი ელექტრული დენით ასტიმულირებდა. მონაწილეები დაიყვნენ სამ ჯგუფად, თითოეული ატარებდა ტრანსკრანიალური მუდმივი დენის სტიმულაციის (tDCS) ყურსასმენებს 20 წუთის განმავლობაში, დღეში ორჯერ, ხუთი დღის განმავლობაში. ერთ ჯგუფში დენი მიმართული იყო დორსოლატერალური პრეფრონტალური ქერქისკენ (DLPFC), მეორე ჯგუფში - ვენტროლატერალური პრეფრონტალური ქერქისკენ (VLPFC), ხოლო მესამე ჯგუფი საკონტროლო ჯგუფს წარმოადგენდა.
ორივე სამიზნე უბანი ემოციების რეგულირებაშია ჩართული. კვლევამ აჩვენა, რომ DLPFC-ის სტიმულაცია SLT-ის მკურნალობაში უფრო ეფექტური იყო, ვიდრე VLPFC-ის სტიმულაცია.
მკურნალობის დასრულებიდან ერთი თვის შემდეგ მოხალისეები თავს უკეთ გრძნობდნენ. ზანიანის უნივერსიტეტისა და ბილეფელდის უნივერსიტეტის მკვლევარებმა აღნიშნეს, რომ „ეს იმედისმომცემი შედეგები დადასტურებას უფრო ფართომასშტაბიან კვლევებში საჭიროებს“.
კლინიკურ კვლევებში ინერგება ისეთი მეთოდები, როგორიცაა tDCS. NHS-ის პილოტური კვლევები მსგავს ყურსასმენებს მსუბუქი დეპრესიის სამკურნალოდ გამოცდის.
„ურთიერთობის დანგრევის შემდეგ ნეგატიური ემოციები დომინირებს და ემოციური დისრეგულაცია ხდება, ამიტომ ემოციების რეგულირება მკურნალობის მთავარი მიზანია. მიუხედავად იმისა, რომ კოგნიტურ-ბიჰევიორული თერაპია ეფექტურია, ინოვაციური და დამატებითი მეთოდებიც ღირებულია, რადგან ისინი ყველა პაციენტს არ ეხმარება“, - ნათქვამია კვლევაში. ტვინის კონკრეტულ რეგიონებზე ორიენტირებული მეთოდები შესაძლოა პერსპექტიული იყოს.
