საფრანგეთის ქალაქ ვერსალში გამართული ევროკავშირის არაფორმალური სამიტის მონაწილეები მხარს უჭერენ უკრაინის ევროკავშირში გაწევრიანებას, თუმცა არა ოფიციალური კიევის მიერ მოთხოვნილი დაჩქარებული პროცედურის მეშვეობით.
ევროკავშირში გაწევრიანების განაცხადს პრეზიდენტმა ვოლოდიმირ ზელენსკიმ თებერვლის ბოლოს მოაწერა ხელი. მისი განხილვა მიმდინარეობს მაშინ, როდესაც რუსული არმიის უკრაინაში შეჭრის შემდეგ საბრძოლო მოქმედებები მესამე კვირაა გრძელდება. ევროკავშირმა უპრეცედენტო ერთიანობა გამოავლინა უკრაინული წინააღმდეგობის მხარდაჭერაში: მან მილიონზე მეტი ლტოლვილი მიიღო, რუსეთის წინააღმდეგ სანქციები დააწესა და წლის ბოლომდე მოსკოვზე ენერგეტიკული დამოკიდებულების შემცირების შესაძლებლობას იკვლევს.
1 მარტს ევროპარლამენტმა მხარი დაუჭირა რეზოლუციას, რომლითაც უკრაინას წევრობის კანდიდატის სტატუსი მიენიჭა. ვერსალის შეხვედრის მონაწილეები ასევე შეთანხმდნენ, რომ უკრაინის ევროპულ გზას ალტერნატივა არ აქვს. გაწევრიანების ვადების საკითხი ღიად რჩება.
