UNICEF-მა დაადასტურა, რომ მხოლოდ აპრილში უკრაინაში თითქმის 100 ბავშვი დაიღუპა, თუმცა რეალური რიცხვი შესაძლოა გაცილებით მეტი იყოს, რადგან რუსეთის მიერ უკრაინის წინააღმდეგ ომმა ბავშვთა დაცვის კრიზისი გამოიწვია. ამის შესახებ UNICEF-ის აღმასრულებელი დირექტორის მოადგილემ, ომარ აბდიმ, ხუთშაბათს გაეროს უშიშროების საბჭოში განაცხადა, იუწყება CNN.
„გაერომ დაადასტურა, რომ მხოლოდ ბოლო თვეში დაახლოებით 100 ბავშვი დაიღუპა და ჩვენ გვჯერა, რომ რეალური რიცხვი გაცილებით მეტია“, - განაცხადა ოფიციალურმა პირმა.
„კიდევ უფრო მეტი ბავშვი დაშავდა და მათი უფლებების სერიოზული დარღვევების წინაშე აღმოჩნდა, მილიონობით კი იძულებით გადაადგილებული პირი გახდა. უკრაინაში ომი, ყველა ომის მსგავსად, ბავშვთა დაცვისა და ბავშვთა უფლებების კრიზისია“, - დასძინა მან.
აბდის თქმით, განათლების სექტორიც ზარალდება.
„გასულ კვირას, აღმოსავლეთ უკრაინაში UNICEF-ის მიერ მხარდაჭერილი 89 სკოლიდან სულ მცირე 15 — ყოველი ექვსიდან ერთი — დაზიანდა ან განადგურდა“, - თქვა მან. ქვეყნის მასშტაბით ასობით სკოლა დაზიანდა მძიმე არტილერიის, საჰაერო დარტყმების და სხვა იარაღის შედეგად.
