დანიის ენერგეტიკის სააგენტოს ცნობით, ბალტიის ზღვაში ორი დაზიანებული გაზსადენიდან ერთ-ერთმა, როგორც ჩანს, ბუნებრივი აირის გაჟონვა შეწყვიტა.
„ჩრდილოეთის ნაკადი 2“-ის ოპერატორი კომპანიის თქმით, რუსეთიდან გერმანიამდე მიმავალ მილსადენში წნევა სტაბილიზდა, რაც იმას ნიშნავს, რომ გაზი აღარ დარჩა. მშენებლობის შემდეგ, „ჩრდილოეთის ნაკადი 2“ უკვე შეივსო გაზით სამუშაო წნევამდე და მზად იყო ამოტუმბვისთვის.
გასულ სამშაბათს გავრცელდა ინფორმაცია „Nord Stream“-ისა და „Nord Stream 2“-ის საზღვაო გაზსადენების სამ ხაზზე აფეთქებების შესახებ. ერთ-ერთი ხაზი დანიის კუნძულ ბორნჰოლმის მახლობლად გადიოდა.
ევროკომისიამ ინციდენტები „საბოტაჟად“ შეაფასა.
