მოლდოვას სურს რაც შეიძლება მალე გაწევრიანება ევროკავშირში, რათა დაიცვას თავი რუსული საფრთხისგან. ამის შესახებ პრეზიდენტმა მაია სანდუმ 18 მაისს France Presse-თან ინტერვიუში განაცხადა. სახელმწიფოს მეთაურმა ასევე აღნიშნა, რომ ის გაწევრიანების შესახებ მოლაპარაკებების დაწყებას უახლოეს რამდენიმე თვეში ელის.
„რა თქმა უნდა, არაფერი შეედრება იმას, რაც უკრაინაში ხდება, მაგრამ ჩვენ ვგრძნობთ რისკს და გვჯერა, რომ ჩვენი დემოკრატიის გადარჩენა მხოლოდ ევროკავშირში გაწევრიანებით შეგვიძლია. რუსეთი მომდევნო წლებში არასტაბილურობის სერიოზულ წყაროდ დარჩება და ჩვენ თავი უნდა დავიცვათ“, - თქვა სანდუმ.
პრეზიდენტმა ასევე აღნიშნა, რომ მოლდოვას ევროკავშირში გაწევრიანება რეალისტური პროექტია, რომლის განხორციელებაც უახლოეს მომავალშია შესაძლებელი. „ჩვენ გვსურს, რომ ეს რაც შეიძლება მალე მოხდეს“, - დასძინა მან.
