რუსეთს ჩრდილოეთ ყაზახეთში სამი რეგიონის ანექსია სურს. პრეზიდენტი კასიმ-ჟომარტ ტოკაევი ამის შესახებ ინფორმირებულია და ამიტომ ყველა ღონეს ხმარობს კრემლის ხელმძღვანელობისგან დისტანცირებისთვის.
ეს მოსაზრება სტრატეგიული კვლევებისა და უსაფრთხოების ინსტიტუტის დირექტორმა, პაველ ლისიანსკიმ, „არხ 24“-თან ინტერვიუში გამოთქვა. მან აღნიშნა, რომ რუსეთის მიერ უკრაინაში სრულმასშტაბიანი შეჭრის შემდეგ, ტოკაევმა გადაწყვიტა, აგრესორი ქვეყნის პოლიტიკური და ეკონომიკური დამოკიდებულებისგან გათავისუფლება.
ექსპერტის თქმით, კრემლი სსრკ-ს დაშლის შემდეგ მხარს უჭერდა ყაზახეთში სეპარატიზმის ნებისმიერ მცდელობას და რუს და ყაზახ მოსახლეობას შორის ქუჩის შეტაკებების შემთხვევებიც ყოფილა. ლისიანსკიმ გაიხსენა, რომ ასევე იყო მცდელობები აზიური სახელმწიფოს ტერიტორიაზე ყაზახეთის შემადგენლობაში „ურალის სახალხო რესპუბლიკის“ და რუსეთის ავტონომიური რეგიონის შექმნისა.
„რუსეთი ჩრდილოეთ ყაზახეთის სამი რეგიონის ანექსიაზე ოცნებობს. ყაზახებმა ეს იციან და ტოკაევმაც, სწორედ ამიტომ ატარებს ის ამ პოლიტიკას“, - აღნიშნა ექსპერტმა.
2014 წელს რუსეთის მიერ უკრაინაში შეჭრის შემდეგ, ყაზახეთის მთავრობამ გაამკაცრა სეპარატიზმისთვის სისხლის სამართლის სასჯელები. ლისიანსკი მიიჩნევს, რომ ყაზახეთმა მაშინაც კი გააცნობიერა, რომ ოკუპანტები ერთ დღეს მის ტერიტორიაზე შეჭრას შეეცდებოდნენ.
ყაზახეთის პრეზიდენტმა კასიმ-ჟომარტ ტოკაევმა ადრე რუსი დიქტატორი ვლადიმერ პუტინი თავის ადგილზე დააყენა. მან უარი თქვა რუსეთის მიერ უკრაინის დონბასში შექმნილი „დპრ“-ისა და „ლპრ“-ის კვაზი-სახელმწიფოების აღიარებაზე. ტოკაევმა ასევე განაცხადა, რომ რუსეთში „გარკვეული პირები“ ცდებიან, როდესაც ფიქრობენ, რომ ყაზახეთი 2022 წლის იანვრის საპროტესტო აქციების შემდეგ „მათ ფეხებთან მოიხრის“.
